De sa terra s’alenu
bintrat in pettus meu
e de sa vida intendo su murmuttu.
E in su coro prenu
m’intendo de recreu,
ca su sutzu assaboro de su fruttu
chi su tempus m’offerit
cand’ ‘e s’incras m’abberit
sa gianna ube mi bàntzigat s’ammuttu
de sa ‘oghe ‘e s’ispera
torrandem’intro lùghida e liera.
E lampizos mi ferin
in sos ojos transidos,
cun lughes in colore de s’ammentu
de bisos chi cunferin
sustentu a sos sentidos,
disizosos de currer cara a bentu
in anderas antigas,
chircande sas istigas
de sas muttas de gosu e ausentu,
chi travigare ancora
dia cherrer innanti ‘e s’ultim’ora.
A bolare mi peso,
cun alas incanidas,
subra sas baddes mias e sos rios.
E a su chelu arreso
custas cambas frunidas
de gosos e de pérdidos appios
nàschidos in sa mente,
appagada e dolente,
prena de donzi duda e disaffios
chi sa vida m’intregat
cando sas dies pàsidas mi negat.
Giangavino Vasco
3 luglio 2014
1° Premio alla 23^ Edizione del “Prémiu ‘e Poesia Sarda Remundu Piras” – VILLANOVA MONTELEONE 2014
/fdata%2F2635925%2Favatar-blog-1083309365-tmpphpwhhvXp.jpeg){kind=avatar}