AMUS BIDU!
Amus bidu muraglias de penas e a fogu, sa zente marcare. Amus bidu berveghes mudare in ienas de vele pienas.
Amus bidu de samben su mare e brujare sas terras amenas e de atomicas, vanas cadenas, amus bidu aeras armare.
Amus bidu, pro cantu isciaista, chi s'accontzat cun cantos de isciau; carre ona, che cando est ispau si la gosit, e iscartos che pista'.
Amus bidu falende su bau a chie linghet pro enner in vista, e pro crescher in domo provista, usat nidu de cucumiau.
Amus bidu giudeos e scimanos, cun piscamos, bonzos, sunnistas, ortodossos, indù chin buddistas elevare sos ricos marranos.
Amus bidu de iscentzia conchistas chi signalan isvistas mundanas, ma amus bidu de paghes umanas, sol’abbojos e memulas tristas.
Cantilenas de corvu a fuinas chi si tinghen de ajudos e penas, isfrutende anzenas granghenas pro chi lastima istoddat istrinas.
Iscunfessan sos malefadados ca disizan incunzas anzenas, ma sos ricos sun comunigados cun sas mindigas pulpas terrenas.
Amus bidu ministru de Deu in su fronte preghende cunfortu, onorende mortore ch'at mortu, cristianu de un'ateru istreu.
|
Cuddos frades catolicos pios chi si pregan sa paghe divina, pro coglire de gherra sos chios l'an armada cun sagra dutrina.
A famidas de rassas cussorzas giughen pane cun sa religione, pro s'iscopu de crescher partolzas
e frunire puddame a matzone.
dae sos campos si sutzat sos ozos e pro fagher ispumos e ispozos, bastat narrer: "Compà, port'abberi!"
Maresciallu chi prenat iscarzu cun s'imbarzu chi l'atit su ladru e su sindigu l'at decoradu cun s'incunza de su prim'imbarzu.
Cussizeri e sessore de pica chi sa fide la oltan in vile, ana villa, alzola e cuile e astrau non timet ne sica.
Giornalista cun sa cinepresa pro mudare notiscia in romanzu, dignidade si endet pro alanzu cun virtude mudada in bascesa.
Pro giambre sa legge a su capu, a zuighe li ponen maneta. De sa cuba s'abberin s'isceta e a nois a mantenner su tapu.
antonalta |