Blog di antonio altana

Unu cuadru de natura, amenu,

chi paret bessat nuscu dae versu,

ponzend'in custu cantu, s'universu

cun briu sardu chi frimmat s'alenu. Altana

De sambene 'ischit su ruju
e nuscat de occasu
e de amore
su grogu leat
su sera 'e s’erva
appena messada a fenu
e m'ammentat sa lughe illuinante
de sa meliagra in beranu.
Nuscos de mare
at su biaittu
e sabor' 'e terra mia,
gosu mi dat e armonia,
comente a donzi recuida
cand'in s'aera suvruscio
fumentos de amenta,
armidda e romasinu.
Fortza mi dat su 'irde e siguresa
ca dae su ruju naschet
ch'est refrega e tribulia
e dae su grogu
chi faeddat a su coro
de ispera e de vida.
No, no lu timo s'ilgerru
si m'inghìrian colores
... comente in tzertas dies
su mare cando pàsidu
assimizat a su lagu.

Prima classificata nella sezione versi sciolti

al “Sant’Antoni de su o’u” di Mamoiada – Gennaio 2011

Cuadru a pinzelladas  de ardore

de duos coros in bolu pesados 

pro chi briu agnangat, abbratzados,

altos arcuparados de amore. Altana

Afranzados apare custu sero

mirande s'infinidu totucantu

t'intrego custos versos, unu cantu

chi lepiu in s'aera si nche bolat

e cada nota sua nos cossolat

cando 'e sas laras tuas m'apodero.

Su mare, birde e netu, paret bridu

e su murmutu suo a s'ingalenu

nos bardat donzi basu e donzi alenu

chi fachet a cuncordu chin sas undas,

ispiju 'e cussas chentu lunas tundas

chi ballan in su putu 'e su sentidu.

in artu sos isteddos sun istiddas

de saliosa e arbida colostra

ch'illatat custa caminera nostra

inube a manu tenta e cara a bentu

nos nche mascamus de su sentimentu

chi bundan de su coro sas mammiddas.

Sas nues paren petenes de seda

ch'ispertan sas isperas de sa luna...

Che carignos de fada, totu in d'una

sos rajos falan, tessidos che filos

de prata chi t'abellin cussos pilos

chi m'agradana meda, meda meda.

Sun anghelos sa janas tessidoras

chi ti chinghen de luche sa carena;

che lampizos de chelu ch"ido apena

t'imboligan in matulos de lizos

goddidos in su pradu 'e sos disizos

isortos prò sas dies benidoras.

In custu sero lenu a s'intrinada

mi paso e non disizo ateru nudda

e si sa frina mi ponet sa tudda

ja bi ses tue, Amo', chi mi cajentas,

mi ninnas, mi cucuzas e mi tentas,

cando bijono custa serenada... 

...e sichit note note custa boche

a ti cantare durche un'anninnia

ch'agabat a s'arbeschida... est maghia!...

...e cras manzanu... semus galu inoche...

xxx° Ediz. prem. Posada - 1° premiu

Nebidos sentimentos de poeta

chi pigat in altura cun sas fide,

e paret nende - sas manos unide,

e damu a Deus su chi Deus iseta'. altana

S’ANIMA (Ignatziu Porcheddu)

         Da-e semper sos passos mi los gestit

         sentza chi tenza modu ‘e mi l’opponner:

         detzidit cando e comente los ponner

ca totu est lughe sua sa chi m’’estit.

Non la tocco! Non l’’ido!...La respiro

chin su respiru sou chi nos ligat

fintzas cando sa morte che la pigat

pro nos divider in s’ora ch’ispiro.

Non la connosco! Eppuru dipendo

da-e su cherrer sou…Non si fidat

a mi lassare solu e mi guidat

in intro de sas cosas chi cumprendo.

Mi cheret zustu, rispettosu e bonu

e cando non lu so mi pittuligat

su tantu chi mi bastat…Mi castigat

si su rancore non borto in perdonu.

Non drommit! No hat pasu! M’istat fissa

fintzas cando su sonnu in prenu leo

ca intr’’e issa vivende so jeo

e in intro de me vivende est issa.

Sa vida chi respiro e chi respirat

e chi serena a esser sempre aspiro,

a su mundu ‘e sa nàschida la ghiro

in s’ora ch’a su chelu la retirat.

Lu creo su chi naro? O son preguntas

a s’Eternu, divina veridade,

ch’est in sa punta de s’immensidade

vizilende e preghende a manos zuntas?

Cantas e cantas cosas mi pregonto

si puru de rispostas non so dinnu,

intantu, chin sa fide e chin s’impinnu,

su no ischire, serenu l’affronto.

Cando si tratat de beru poeta

sos versos bogat laminados d'oro,

ca onzi pessu chi l'enit a coro,

est pienu de sensu e rima neta. Altana

Chirco pasu in tottue e m'accumpanzan
'ideas chi sa mente m'assussegan.
Istolas de sentidos no mi negan
bramas ch'in coro meu s'apposentan;
sos lamizos de sole mi caentan
in àndalas de lughe chi m'affranzan.

Chirco pasu in ampàros, mentras crèschen
sas curreras de dies ch'ispampàrrian
ogros a tempos mios; chi mi àrrian
ganas pro ch'intre in su secolu nou;
pro ch'assumancu in isse agate a prou
ranzas de sorte chi no s'incruèschen.

Isco chi non solu sutta infados
in sa fazza 'e sa terra; inue a ch'esser
'alet sempre sa pena... pro resesser
a s''ider biu tra tulus chi fiorin.
Isco chi tantos benes s'isvalorin,
no duran che marengos in siddados.

A bortas penso, in sèmidas d'anneu,
a carch'ispina chi costas mi punghet.
Accò chi tando sa forza m'azunghet
ardores pro jampare 'addes fungudas;
e chene pasu in ispundas de recreu.

Chirco pasu in muìzos de sos bentos
chi mi nìnnan in brazzos de sa notte;
e chirco pasu in bisos pro chi potte
viver d'ammàjos in mudos de oro.
Custas pagas durcuras ch'assaboro
mi dan briu che linfas de sustentos.

E sigo andare, andare a donz'ora,
lassende s'umbrach'iscuru mi 'ettat,
ca semper bia paret chi m'isettat,
s'ispera chi m'imbèrriat che fada;
pro ch'in s''ena 'e sa vida illacanada
in àndalas de lughe passe ancora.