Blog di antonio altana

Ruet su piuere

subra manos acucuruddadas de vida

e pibinidas de rasposos ammentos

iscumbinana

cust'atunzu calmu.

Intendo iscuder passos graes

subra annos currumpidos,

veridades implacabiles

pressana

in infinidos isetos.

Uesisiat chi sias

deo bi tep'essser

asa a intender ancora nuscu arcanu

de s'umbra bitulera

e in su mudore de unu sulu de amore

apo a redisegnare

biaitore de cuss'asu

mai ismentigadu. Altana

Ci sarò (di Angelica Piras)

Cade polvere
sulle mani colme di vita
e briciole di ruvidi ricordi
disordinano
quest'autunno mite.
Sento battere passi grevi
sopra anni corrotti,
verità implacabili
premono
sull'interminabile attesa.
Ovunque sarai
io ci sarò
sentirai ancora il profumo arcano
dell'ombra randagia
e nel silenzio di un soffio d'amore
ridisegnerò
l'azzurro di quel bacio
mai dimenticato.

Pesso ch'ispera de sa poesia

faeddet issa pro sos sardos coros,

e creo restet tra sardos tesoros,

fadadu pinzu de pregadoria.

Ca brama e bolos de sa fantasia

an segadu cadena a cussos moros

pro torrare sa lughe a un'istella

ch'at isciaridu su torru a Rossella.

 Altana

Bola penseri  (Giovanni Pira)

Bola penseri! B'ola! non ti cues

Bola che ae! Supera su chelu.

O sas alas isparghe che anghelu,

e bola pius artu de sas nues.

Bola, non timas, in su mare apertu,

atraessalu totu chin coraggiu

poi prosighi su tou viaggiu,

buscos e campos, totu su desertu.

Montagnas e distesas de arena

atraessalas che su pesamentu.

Firma-di solu s'intendes lamentu

de carc'anim'in ansi'e in pena.

E si bides domeddas e cuiles,

chin carchi moro armadu a sentinella,

firmadi ca in cue b'est Rossella

incadenada da omines viles.

Cando bides a issa, tando pasa,

non timas sentinellas ne iscortas,

l'afranzas, la carinnas, la cunfortas,

e totu sas notitzias li dasa.

Narali ch'in sa patria isolana,

babb'e mama pro issa sun afrantos,

preghend'a Deus chin totu sos Santos

pro chi torret a domo bia e sana.

Narali chi in totu sas cresiàs

e campos isportivos, sos atletas,

ballerinos, cantantes e poetas

an pregadu e contadu poesias.

Chi dae Tortolì a s'Alighera,

da Teulada a Casteddu sardu

e totugantu su populu sardu

no at pro issa perdidu s'ispera.

Bola penseri! Cumpri sa promissa,

Chirc'a Rossella, daeli consolu.

Cando torras però, non torres solu,

bae penseri.... e torra chin issa.

                 "A bolu"     

S'idet intro sa rima su carignu

chepare a cuddu chi t'at fatu mannu,

e de ternura su pius altu iscannu

intreghende li ses cun dulche assignu.

Antoni

A Tie Mamma, po sos chent’annos.

Aguri a medas’annos.

di Tonino Fancello

Naschida dae tempus furistera
de milli benes e de cosas raras
basandet una luna d’oro in laras
po favoriret cussa caminera.

O fada chi m’has dadu custa luche
e nove meses m’has trazad’in sinu
intendo sas campanas de s’ostinu 
chi sonan festas chin s’eterna ruche.

E rides galu cantas ca ses bia
tocas su chentenariu ch’est de oro
a nottas chi nde grinan armonia.

Su tempus in sa cara su decoro
lassat in donzi prica ch’est a ria
pintad’a sentimentu intro su coro.

Medas poetas de su campanile,

a Sardigna cun sardos, rimein tantu,

ma tue su ricamu b'as agnantu,

pro randare de s'isula s'istile.

La randas chin sos rajos de s'ispantu

e nuscos e colores de abrile

abbelzend'in nuraghes su jannile

pro launeddas prontas a su cantu.  Altana 

Amigu, fizu e frade 
 

Fizu ’e sa notte d’epocas lontanas
bestidas de misteriu e umbraghe,
inue at suttu su primu tenaghe
de raighinas restadas arcanas
cando iscavadu hat sas domos de janas
e hat ficchidu su primu nuraghe.

Com’allu in punta ’e su Gennargentu
reu, accheradu a sas innidas rundas
chi a carignare, sol’issu e sas undas
de su tempus han hapidu s’appentu,
umpare cun su sole e cun su ’entu
e cun pallidas lunas vagabundas.

Inie intrad’a pare hat sos aneddos
de s’antiga e moderna sardidade,
e cun cantos de paghe e libertade
hat fattu serenada a sos isteddos
cand’in s’altare ’e sos chelos nieddos
fit de issos sintzeru amigu e frade.

Poi l’han bidu isparghende suore
peri sas tancas de tottu su mundu
ue ’e s’animu nobile e fecundu
b’hat lassadu profumos e sabore,
e sementan de paghe e de amore
hat ispaltu cun sentimentu bundu.

A manu-tenta ’e su tempus in fua,
cun onestade hat rujadu ogn’iscena.
teneru e dulche in s’andala serena,
severu e forte in tempus de antùa.
A coro sempre in manu in domo sua,
umile e rispettosu in domo anzena.

Accollu como su fizu ’e Sardigna,
de noales anderas a. costazu
Ma sas mizas de annos in passazu
non l’han mudadu s’istrina benigna
chi custa mama l’hat dad’in cunsigna,
de cumprender in issa ogni limbazu.

E ca issu li hat suttu sa colostra
rispondet a su giàmidu ’e sa corra
cando b’hat de parare sa pettorra
pro difender s’amada isula nostra.

Primo classificato al Premio Logudoro 2004 - Sezione rima a tema impostu: “Chie est unu sardu?”

Bandu acoradu pro mantenner sardu

nebid'in limba e in sos tzelembros,

coment'a dimustradu chin sos membros,

eroicu valore in donzi azardu.

Bandu pro chie cheret in labia

versos chi fatan sa mantessi rima,

isburrende s'istoria cun s'istima

chi sirigheit in terra nadia.

Bandu pro chie cheret faeddare

limba sutzada paris cun colostra,

acussorzada in donzi vena nostra;

chi deet solu natura modellare.

Altana

 Limba sarda campadora   

di Michele Podda

Die bona non t’as a bider mai
limba sarda istimada moribunda,
da continente est arribada un’unda
chi, tenta a tzugu, t’est ochinde jai,
prenèndeti sa buca est azumai
s’italianu, che una pedra tunda;
non bi campas pius abbisu meu,
morzende ti nde ses, non cherzat Deu!.

Ite bellesa su chistionare
a sa moda de donzi biddighedda
de donzi tzitadina, manna o dedda,
chi duas non bi nd’at a un’andare!
Si las cheres istrocher e brullare
tando donz’una pìgala e faedda,
totue issa t’alligrat su coro, 
Gaddura, Campidanu o Logudoro.

A l’ischis ite narat calicunu?
“Sos sardos non si cumprenden a pare”!
Chi morzat e non torret a pesare
cumente est beru chi su sardu est unu!
Pro cussu non cherimus chi niunu
si ponzat limba noa a imbentare;
a chie cheret l’agatat totue,
si no bi la naramus deo e tue.

No! Non ti moris, ca non ti lassamus
a ti ghetare a terra s’inimigu,
cussu chi paret bellu che isprigu
non binchet, ca sas trassas li ogamus,
fronte a s’italianu li paramus
ponende su limbazu nostru antigu;
si podimus mantenner issu fora
tue torras in trassa, campadora.

(Segnalazione "Cuncambias 2009" S. Sperate)