1 min ·
Su catedràticu
Egregiu Mostru Sacru, chi arrocadu
ti ses de sa cultura in alta chima,
ammito ch'apas perdidu s'istima
a s'Arcàdia, nota in su passadu,
però como in su tou potentadu
no atzetas ne mètrica ne rima.
Como chi coltu diventadu ses
ti pones sas otavas suta pes.
Si torrat su diluviu universale
e ses tue su padronu 'e s'arca,
lassas a terra a Dante cun Petrarca
e salvas Cuàsimodo e Montale.
Ma pro su gustu tou viscerale
non los retiro sos remos in barca
che tzertos chi sa rima ant a fadiga
e acatan s'iscuja ch'est antiga.
Tzertos chi poetende ant pagu alenu
pro poesia baratant sa prosa
e sigoment'est zente imbidiosa
isputzint sempre s'operadu anzenu.
S'impotente, de boria pienu,
s'arràbbiat si nuda 'idet s'isposa.
Matzone chi non giompet a sa ua
bogat s'iscuja ch'est ancora crua.
A sos poetas improvisadores
continu segas sos pannos a dossu,
e cun fritzas chi passant pulpa e ossu,
bersaglias puru sos ammiradores;
ca non sunt che tue professores,
los cheres carrarzare in d'unu fossu,
però si los apretzant in totue
sos poetas sunt issos e non tue!
Ma ti cheria ponner a su prou
poetende in sa palcu, in una gara,
cun cussa poesia a tie cara,
e a carchi Solone amigu tou:
ponzo su tuju contra unu tzou
chi sos fruscios s'intendent in limbara...
Poi non restat anima peruna:
restas tue, su palcu e-i sa luna!
Est fatzile retzire su cunsensu
de un'istriminzida "Rosa mìstica"
ue fintzas su rutu est cos'artìstica
e pari pari si betant s'intzensu.
Su pobulu però no est propensu
de poetare in giae futurìstica.
Mi meraviglio de carchi giuria
ch'avallat cuss'abortu 'e poesia!
Pasche puru novellos "Leopardos"
in custa tua riserva de catza,
ma lassa seberare a sa piatza
sa poesia chi cherent sos sardos;
so chi pro te sun poetas bastardos,
pro issa sun poetas de ratza!
Sovrana est sa piatza in fund'in fundu,
non ses tue s'imbìligu 'e su mundu.