Blog di antonio altana

Che’ su sole in s’abréschida ‘e sa vida

accherada ti ses in custu coro,
prenàndelu ‘e sa lughe chi cheria,
cando in àndalas, solu, m’ismarria,
attraessande tottus sos insoro
ordiminzos, in chirca ‘e un’essida.

Ch’as dissipadu in altu cussa nue
chi donzi ghia mi che fit cuande,
in cussu chelu chi prùs non bidia.
Fit gai, tando, custa vida mia,
prena de milli dudas, chi chircande
fin calch’ispera, chena ischire inue.

Attesu mi pariat donzi gosu,
in cussu mare, in mesu ‘e sa tempesta
de sos sentidos mios atturdidos.
Attesu che fin fintzas cussos lidos
de terras ube mùidas de festa
m’istraccaian, dàndemi reposu.

Cumpàrfida mi ses in s’orizonte,
cando prùs nudda deo isettaio,
in dies troppu in presse consumidas.
E chena mi connòschere m’affidas
cust’amore, chi bider non podio
in cuss’iscuru chi tenio ‘e fronte.

E paret chi mi nànnighen sas undas
de custas abbas pàsidas chi tue
m’as ammustradu in custu mar’ ‘e penas,
ube m’abbarraian pagas renas
de sos afficos, pérdidos tottue,
chircande veridades prùs profundas.

Ma como, de sulcare custu mare
timore prùs non tenzo, ca cun tegus
subra sas undas nàvigo serenu.
Si puru in coro ‘e làstimas so prenu,
in custas abbas prùs non torro insegus,
fintzas ch’in custa vida ap’affundare.

Bortigali, 7 settembre 2008

1°Premio al Concorso di Poesia “Su casu” – Sindia 18-12-2010

Coro meu ajò ajò.

Coro meu ajò ajò a sa tanca a binnennare

duos si poden cojare

però non tenen pabiru,

bellas de su monairu

sun in mare navighende,

tres piscasdores pischende

intro de una pischera....

Luche a lampizos d'oro
intinghemi su coro
irbiadiu 'e poeticos pannos,
ca pius no assaporo
cudd'arcanu tesoro
chi m'it issoru dae tempos mannos.
Luches de universos
chi ispiraian versos
incanudios paris chin sos annos
como non bido raju
de ispantu, durcura, o de ammaju.

Ca 'entos de travuntana
in su coro bardana
han fattu chin mulinos d'astraore,
e sicca sa funtana
ne abbas e nen gana
tenet pius de iffundere fiore.
In su campu ervoridu
como non fachet nidu
sa prantarita* chin cantos d' amore ---*allodola
morta chei sas mias
emossiones de sas poesias.

Gasi su coro sonat
e pius no intonat
in s' anima durcuras de armonia,
nen s' imbentu m' ispronat
ma antis m' abbandonat
su pessamentu innidu ch' haia
de iscriere serena
umile cantilena
po chi mi torret sa vena fuia
andada chei s'unda
chind' una malispessia moribunda,

Dae custu giannile a unu ‘oe,
frades mios, cun lùghidas isperas,
miro su tempus bìdrigu de oe

pro bi chircare aniscas galaveras
chi a su cras sian ura 'e bonu proe.
Ma chentales de pìdigas aeras

mi faghen tìmer' chi in su benidore
sighire amos a pè pittiriaccas
peleosas de làstima e rancore.

Dae manos, de pasu infertu istraccas,
amos a perder' s'estru 'e s'isermore
mirende nos las bènnere teraccas

de no ischimos mancu cale isbagliu
nos eppat, dae òmines de judu,
mudadu in zente chena prus tribagliu.

E gai amos a viver' in s'impudu
d'aer' crètidu a cussu giogu vagliu
chi, trasuleri, nos at postu a nudu

sa neghe 'e olvidare sos insinzos
de cussa sabiesa 'e contivizu
chi no tzedìat a sos pistighinzos;

ue sa dignidade fit ricchesa
cumone, mama e fiza 'e se matessi,
pane ch' ammeraìat coro e mesa

de sos chi resessìan, a su nessi,
a lograre cun seru sa tzertesa
de no colare die essi per essi.

E ue s'agateren in su mundu,
appende afficcu in se, frade cun frade
s'aggiuaìan paris ca in fundu

s'esser'zente de bona voluntade
nde faghiada òmines de bundu,
ghiadores de cussa dignidade

ue est ora'e torrare fittianos,
frades mios, e sòlver' s'iscurore
de custos tempos malos e metzanos

pro chi in sos chelos de su 'enidore
nos torret intr' 'e coro e in sas manos,
miraculosu, s'estru 'e s'isermore.

Primu Premiu Rima a tema impostu Dignidade: fiza e mama de … setzione Musserradu Meridda - Premiu Logudoro Otieri 2013

(Est prejadu calesisiat ajudu de curregiu siguru pro calchi versu trascritu male.)

Dido

Proite m'as lassadu ingratu Enea

in tantu insoportabile penare.

Pius bella nde poden agatare

ma chi t'amet che Dido non bi crea (s).

Enea

Non ti atristes amabile sirena

mudabile pro te non so ancora,

tedesser de su coro triunfadora,

isolta cust'orribbile cadena.

Dido

Viver tue inserradu in cussa gabbia,

cunserva sos amores cun cautela,

m'amas de totu coro e non de labbia,

pustis chi da Cartago as postu vela;

infines ses trojanu e de s'Arabbia

e de Paris gia tenes parentela.

Si m'amas, a Lavinia istruechela,

si ti cheres de Dido innamorare.

Enea

Dido mia, e proite mi declaras

de Paris cussu passu isfortunadu,

de afetu non fit si non de laras

e pro fortza a Lavinia ap'isposadu;

penetrante saeta cantu naras,

dogn'antiga piae at rinnovadu.

Si Paris variabbil'est istadu,

Troja nos est istada ingannadora.

Dido

Proite as lassadu sa tua Dido

brujend'in dunu fogu insuportabbile;

brujend'in sas fiamas de Cupido.

Fiamas de s'inferru veritabbile,

fiamas dae sas alas miro e bido

incostante a s'afetu inesplicabbile;

o barbaru incostante e variabbile

ch'as cherfidu a Catagine burlare.

Enea

Incostantes non sun ne variales

sos afettos chi t'apo inclita rosa (famada rosa)

sunu tantos sos atos protzessuales

chi m'intiman a gherra istrepitosa;

pro calmare sa penas infernales

mi so idu obbligadu a tale cosa.

S'idulu meu ses e i s'isposa'

chi torrende a Cartago amo a dogn'ora.

Dido

Amores totu viles de un'amante,

non so pius de Cartago alta reina,

felice cuddu forte Fioravante

ch'at proadu s'amore a Dursolina,

Legges de Orlandina a ogn'istante,

de Clori principessa alessandrina,

tota s'Ispagna cun sa Palestina,

bell'armada pro dido an a formare.

Enea

Cunsiderami Didò in simizantzia

unu Buovo D'Antona cun Drusiana,

amantes de favore e de costantzia

comente Rizieri e Fregorbana.

Suterradu an s'amore in timoramtzia,

Otaviu e Lucretzia romana;

ma sa zente adriatica e trojana

an'a morrer pro te rica aurora.

Dido

O ninfas, consolade un'infelice!

Musa de unu mare abbolotadu,

de Cartago sa grande imperatrice,

perfid'e bruta ratza at ingannadu,

ratz'e Laomedonte ingannadrice

chi dogni giurament'at afaltzadu;

si ti cheres de Dido innamoradu,

procura a Lavinia abbandonare.

Enea

Si custu regnu tou s'isterminia',

ite irgonza, ite vituperiu,

a Dido apo amadu e no a Lavinia

cun ardente fervore e desideriu.

tedesser de sos regnos s'ignominia,

morrer Dido in tantu cativeriu,

dami calchi sucursu a refrigeriu,

non ti mustres che tigre traitora.

Dido

Si cheres dae me assistimentu,

cunfirmami fidele s'intentzione,

prite s'amore tou est totu entu

chi paret simizante a faraone;

faghem'unu solenne giuramentu

pro cunfirmare in s'istimassione,

però si t'innamoras de Didone,

de velenu a Lavinia as alterare.

Enea

Girare depes baddes e montagna,

dogni corona e dogni reinadu,

amante si sa sorte m'acumpagna'

de torrar'a su nostru antigu istadu,

ogn'iscetru as a tenner dae s'ispagna,

ogni tartaru su pius sublimadu,

de ochir'a Lavinia apo giuradu,

s'isposa brut'infame traitora.

Dido

Finis proite tantu argumentare,

si cheres a Lavinia, gloriadinde,

si non m'amas e deo t'ap'amare

s'amore de pius s'est aggrandinde;

ma si tenes bidea de mi lassare,

dae sa terra mia baetinde,

ma si lassas a Dido, ammentatinde

ch'in Cartago pius non dees intrare.

Pius bella nde podes agatare ...

Enea

Pro finis non prolungo s'argumetu,

ponzo fine e congruo cust'istoria;

l'amo de totu coro ogni momentu,

impremida ti tenzo in sa memoria.

Ti fato unu solenne giuramentu

de torrare a sa nostra antiga gloria,

tue sola tes'aer sa vitoria

de su mare, sirena incantadora

tesesser de su coro triunfadora...