Blog di antonio altana

Chin sa lanza 'e s'ispera in su caminu
e s' istella 'e sa sorte po isprone ,
chin sos pantamas de s' illusione
e sa roda 'e sa vida po mulinu .
E po caddu, romasu su runzinu
chi m' hat zuttu po tottu sas carreras
gherrande chin incantos e chimeras
in sos prados de murta e romasinu.
Inue de dolu cantan orizontes
e sas abbas attitan sas funtanas
inue s'ischidan e ballan sas janas
a sos muilos de mares e de montes.
Hapo sighiu sa tratta infinida
e chircau su 'adu 'e s' attraessu,
ma sa roda zirau hat a revessu
in sas anderas de tottu sa vida.
E chin su garriu grae 'e sos disizos
tra lughes de s'intzertu e s'isconnotu
so andau chircande a mim' etottu
peri mares de zente a manu in chizos.
I nue sos passos de s' umanidade
galu tzertesas non m'hane torrau,
inue sas abbas non ch' hane lavau
sos sinnos mannos de s' identidade.
E cando sulat bentu e falan rios
in custu tristu logu eremu e poveru
mi paret de su monte su rimproveru
po tottu- cantos sos lamentos mios.
Lamentos de feridas chi sa lissia
supra sas praes no han' assutau ,
lamentos chi debadas han' pesau
milli batallas contra s'inzustissia.
E oje chi paso sutta s'ischizada
a su cantu irridente 'e sas terpias
bido dae nou sas isperas mias
imberghende po s' urtim' appontada.
Andat torra sa pupa peri prados
de sos casteddos ruttos in s'aèra,
fortzis so jeo s' urtima chimera
in mesu e custos montes assolados

Primu premio Desulo 2005

Bortada in loguderesu dae Altana

Su bentu oje frusciat pius forte

ischitzende de mare sos ammentos

e mudan in balcones sos lamentos;

boghes cun fruscios, mulinadas cortes.

Narat de te insegus de s'ispiju,

sorte chi non t'isetat ne ti ferit,

imberghida tra poju chi s'abberit

peus de ierrale eladu inghiju

ch'ispozat naes , butones de rosa

e turmentat acutu rimpiantu

cun sas perdidas bagas de su bantu

e mai cunfortu de bida fadosa.

Mi turmentan cun aspru rimpiantu,

ocajones e frases mai nadas

perdende tando beras cunfrontadas,

solu pro vanas presses de iscantu,

timores chi nos marcan tot'intreu

in braga ispartu pro nd'aer afiu

de cuntentesa in chios, de vanu briu

cun tribulos oldidos de anneu.

Poi frinas lenas in s'istadiale

chi nos ponet che lizos a sa lota

miraculu de atza gia connota

e de delicadesa virtuale.

An'a restare lebias, galanas,

ternuras de pitzinnos simizantes,

rajitos grogos in ojos penantes

e in pasteras cun sutzosas ganas.

E tremet solidade posta in manos

a ojos isperdidos in ammentos,

abbat sos lizos a butios istentos,

ranchida cura de tempos lontanos

Sos iscarpones mios senza vundu
Ant catigadu cussorjas de gana
Lassande improntas in terra ruzana
Fritta, palas a sole, caentada
Solu dae zappu e da s'arvada
Serrada a muru sicu tott'in tundu.

Babbu mi l'at donà cun tantu amore
Che cando mannu esseret s'ascusorzu
E che issu, messande trigu e orzu
Sighinde s'arte, e suoradu in chizos
Peso sa varche a chelu, paren lizos
Sos mannucros d'ispigas, su laore,

M'enit a undas ch'ispinghet su entu
Basandemi sa cara sun cuntentas.
Che puntura in sinu sas lamentas
De babbu intendo, tocheddat su coro
Nandemi fzu: Custos granos d'oro
Los beneighe, cras est pane lentu.

Sidiu e sole l'intendo che fogu
In sa carena chi lenta brujades
Ma non brujat s'ispera chi mi dades
Sa siguresa ch'intendo frorire
Che zusta paga 'e su tantu sufrire
Canto e rido che pizinnu a giogu.

Canto sos bisos de sa pizinnia
Artu volande, cale turturedda
Sidiu de lugore. Una taschedda
De pazinas d'iscrier, supra palas
Annadas bonas e annadas malas
Dies de sole, nottes de traschia.

Sos bolos sunt restados rasu-rasu
A sa terra chi ranghino sicanna
Però de issa sa parte prus manna
Nde fatto mia 'e sos lughidos chizos
Aundan cuddos candidos disizzos
De babbu, e s'umbra sua mi dat pasu.

1° Classificato - Sezione Sardegna del Concorso di poesia sarda “Istillas de lentore” Ulassai 2013

Una poesia po sas feminas, tropu frecuente vittimas de abusu, de violenzia e de morte

Si dia resessire da 'onzi cosa
comente faghet s'ape, a nde 'ogare
su nettare prus durche, po bos dare
chin su coro serenu a un' a una..
una pintura a lampizos de luna
e unu distillu 'e lentores de rosa.

O che puma chi 'olat lena lena
a bos faghere 'entu in sas massiddas,
po assutare in ojos sas istiddas
de lagrimas versadas de dolore,
chin cussas belvas chi azis dadu amore
però bos han torradu orrore e pena.

O puru a bos cantare a sas aèras
una cantone prena de cossolu,
pesada chin istima a bois solu
reinas de saveine in s'esistentzia,
vittimas de abusu e violentzia
de manos assassinas e de feras.

E nde dia pigare dae mesu
de su frore sos nettares prus bios
po los iffunder custos versos mios
in sos granzeos de sa dilighia,
e bos narrer : atzettadela est sa mia
essentzia chi no hazis mai intesu !

E gasi dia faghere chin totu
cuddos chi chin sa fortza prepotente
chircan de pinnigare attera mente
a su meschinu modu 'e faghe' issoro,
ma chircadelu in fungudos de coro
su galateo chi no hazis connotu !

E istringhendebos, tottu inghirlandadas
chin bois a intundu e zeo in mesu,
li dia narrer a chie no l' hat cumpresu :
non binde cheret francas de astores !
A las bides ? Sas feminas son frores
e che-i sos frores cherene trattadas !

3° premio Santu Lussurgiu 2013

Subra sos padros mios
sas umbras sun calande
de nues chi minettan temporada.
De sos bundantes rios
su murmuttu m’est nande
chi s’abba insoro est tùrbula e luada.

Cun sa mente atturdida,
so chircande un’amparu
po poder custu tempus affrontare;
sa muta ch’est fuida
de su chelu prus jaru,
ma non risulto a mi l’ismentigare.

Bazi in bonora dies de lugore,
chi consolu a cust’ànimu azis dadu,
como sa tanca ‘ostra apo lassadu
po caminare in terras de dolore.

Bazi in bonora dìligos fiores,
chi coloridu m’azis sos beranos,
cando bos nde collia cun sas manos,
incantadu da’ nuscos e colores.

Un’isperza m’infundet
de tèbias pispias,
mentres lentu camino in cust’andera.
Sa mente si cunfundet
in sas peleas mias,
chircande in chelu lughes de ispera.

Un’iscàmpulu ‘e sole
m’iscaldit sa carena,
fortzis ancora attesu est sa tempesta…
E paret chi che ‘ole
in d-una terra anzena.
Bazi in bonora, tìnnidas de festa.

(22 aprile 2013)
1° Premio "Santu Mauru" – SORGONO 25 maggio 2013

09:37 Scritto da montacutu in poesia sarda | Link permanente | Commenti (0) | OKNOtizie

Scrivi un commento

Non sei connesso. Per connetterti, Log in

Il tuo nome:

La tua mail:

La URL del tuo blog:

Il tuo commento:

Ricorda i miei dati per i prossimi commenti:

Notificami in mail i successivi commenti: