Non fetas, superbu riu (Ignatziu Mannu)

Non fettas, superbu riu (Ignatziu Mannu)

Non fettas, superbu riu,

tantu fracass’in passare

ch’a trainu des torrare

comente fisti unu die:

cussas undas, crê a mie,

las det siccare s’istiu.

Troppu superba sa fronte

alzas, o riu orgogliosu:

benis da un’horrorosu

appenas cognitu monte

eppuru non bi hat ponte

chi bastet pro ti jampare.

B’hada rios pius graves

senza cumparassione,

rios ch’ind’ogn’istajone

sustenent immensas naves,

e puru current suaves

plazzidamente a su mare.

Cando passende minettas

su pastore e i s’armentu,

tando cun attrivimentu

trazas mandras e pinnettas,

finzas sas undas chi ettas

mandas turbende su mare.

Da una ignobile vena

tenes origin’oscura

e non podet tenner dura

cuss’abbundante piena:

in arida e sicca vena

des benner a terminare.

T’ingannas riu si crês

de dura sas abbas tuas,

una chida asciutta o duas

ti mudat de su chi ses.

Senza m’infunder sos pes

isetto de ti passare.