Pruite, poesia?... (Antonio Maria Pinna)

Muda che-i su sole 'e manzanile

ti acheras a sa giannas de su coro

giara che luna cun passittos d'oro

m'iscassiddis su sonnu e mi turmentas,

cando che massajeddu abberis, tentas

in sas tulas de s'intimu. Oh! deghile

cumpagna sentza cara, naramilu

pruite mi turmentas e mi giughes

a piangher in pês de milli rughes?

A rier cun sas laras sentza gana?

A cantuzare sutta sa funtana

attittende su mortu a man'in pilu?

Eppuru non ses sole, non ses luna

e nemmancu mamma cara tue ses!

Ma tando pruite, prite cun sos pês

chi paren alas mudas, ogn'intantu

frimmas su 'olu e pesas unu cantu

a boltas pro disgrascia o pro fortuna?

Ajò! O sentimentu sentza muros

narami chie ses chi tantu impreu

de me faghes? e chie, forsis Deu

ti mandat? O su chelu biaittu?

Oppur'in cudd'inferru malaittu

t'han post'in manu poddighes maduros?

O fizu, fizu amadu, si l'ischeras

cantu suffro in cust'ora chi mi giamas:

gia l'isco chi m'odias! Ma chi m'amas

pius de te mantessi hapo cumpresu;

ma su "pruite" est mannu, est tropp'attesu,

ZIGANTES l'han iscrittu in sas aeras!...

Tue, como pianghes, e addite

pianghes e iscries mi dimandas?

O poeteddu ruzu, raras randas

ti orizan sos saltos de s'anima!

Canta, canta, versa calchi lagrima:

...pustis mortu cumprendes su proite!

Antonio Maria Pinna

Primu premiu Otieri 1983 (Musserradu Meridda)

Tema impostu "Pruite sa poesia"