Abrile (Altana)

1

Abrile abberit s'oju sonnigosu

isparghende sas tebias cantones;

abes, faghefarinas, culivones

a bolos intramados

mudan ordinzos in ballos pesados,

intro s'arcuparadu tou donosu.

2

Su caloreddu lenu, amenu gosu,

randinas subra nuscos e sabores,

montes e litos cun bios colores

istuzighend'amenu rusignolu

a notas de consolu

acoradas che mai, meravizosu.

3

Bogat ricamos su filighe umbrosu

suende pagos rajos chi sas fozas

l'ispibinan a tratos dae lozas

infiocadas de grogos lugores

tra piulos minores

a bicu abeltu pedit pibiosu.

4

In sa maghia; Lizu gloriosu

paret chi mandet basos a su balcu

increjuradu tra chelanu palcu

cun biaitos colores de su mundu

e respirat in tundu

alenu de timanza pius nuscosu.

5

Asi, bramas d'anzone gioghitosu

chi a perdidu mama, pro sa fua,

e como tropu oghes che-i sa sua

frenan isperas de aer ajudu,

ma colostrin'acudu

l'apagat poi s'ammentu paurosu.

6

Mese de sa pintura, geniosu,

cun tebios rajos solves sa eddia,

a frearzinu fritu, in allegria

mudas sos tunciu e pones ardores

in antigos sumores

lassende cudd'ammentu tediosu.

7

Mese de umana brama isperantzosu

zuighe tra murrunzu e armonia

ses a sos benidores lugh'e ghia

e cunfortu a sos giovanos amantes,

gioja pro tribagliantes,

tebiu apozu a su fritorosu.

8

Abrile mese pius amorosu,

eranu de rinaschida natura,

abberis oju a donzi criadura

chin su dulche risitu,

istrinas briu e paghe in donzi situ

e ingalenos dulches pro reposu.