Undas... (Antonio Sannia)

Provade a bos frimare,
undas raras, lieras,
de luttu bos an cherfidu indorare;
su colore 'e su mare,
comente sas aeras,
de nieddu an decisu 'e lu pintare.
Cantos frores e lizos,
frades, mamas e fizos,
bois solu azis potidu abbratzare.
po lis dare consolu,
in s' adiosu de cuss'ultimu 'olu.

Tue luna dechida,
mama de sos isteddos,
ch'andas in su mare a t'abbaidare;
contanos de sa vida,
de mannos e piseddos,
chi calicunu at cherfidu leare.
Tue mare 'e lugore,
como ses de dolore,
s'ispera in morte as depidu mudare,
e finas donzi anelu,
ch'assiguradu tenen como in chelu.

Beni lestra a sa rocca,
unda chi fis de gosu,
cun sos pitzinnos ponedi a brincare:
bianca che sa frocca,
cun fagher amorosu,
dalis carignos, faghelos giogare;
e prenalos de frores,
de rena, de colores,
sun anghelos, cominzan a bolare,
in su chelu lughente,
po torrare s'ispera a meda zente.

Undas de solu amore,
in su mare profundu,
a donzi frade dade libertade;
finas paghe e calore,
ch' atzendana su mundu,
d'affettu, de sentidu, d'amistade..........

..................a su mare perdonu dimandade.

Menzione d'onore sezione rima del 23° Concorso di poesia in lingua sarda "Sant'Antoni de su o'u" - Mamoiada 2013