botanica sarda (Altana)

Rena, giogheddas e lizu marinu

abberin a s'istranzu s'antarile,

Mustrat su coro a ospitale ighinu

in su cuntzessu cumbidu deghile.

Marcados usos de antigu istile

iscanzit su surrisu femininu

porrende pabassinu pius bellu

acumpanzadu cun su muscadellu.

Sas giogulonas rocas modelladas

sun meriagu pro funtanas friscas

e ruju e bilde de figumoriscas

li tinghet sas unditas indoradas.

In sas paules de ider arriscas

porcrabos in ludosas morigadas

e rujas rejas de suerz’in terra

miran ispozas de sa cuntierra. 

A tretu, murta cun melelidone,

cundin su nuscu de su castannalzu,

fenaile, aena cun su cannajone,

de niberu an umbras a imbarzu,

mela de frusciu, teti e laru alzu,

ponen in umbra ranu ‘e cuscusone,

aspridda, ispinasanta chin tighinzu,

brigan cun tamaritu e bidighinzu.

Poi chelcu, aliderru e oladighe,

lean in giru su basciu pirastru,

melachidonza, carrubba e ozastru,

fuen dae rueddu e calarighe,

lazarolu, saucu e tilimbastru,

restan a frimma chin su laturighe.

Berbena cun ambrosia lean fenuju,

pro fagher iscialadas a marruju. 

Azu, apara, lizu e isciareu,

 fuen timende sa cannaulpina,

sa lua chi la nomat aldureu,

cagarantzu, li narat limbaoina,

alissu, limbecane, ervapuddina,

sono gelosos de su murguleu,

rosacanina tumbu e gintiana,

chilcan calighemuru e melejana. 

Ramine e ligadorza su trovozu,

istrinat a cogodi e ciclaminu,

filighe,forchitedda,frusciu, lozu

ardunetu, ardumele, arduaininu.

S’olia che catzat sa chessa de ozu

ca non cheriat azucolorinu

ervacamu cun giuru leat cumbata

ca misciat feruledd’a s’ammurata.

Alinu, alchimissa, matigusa

cun coaeatu paris a sulzaga,

andant pro castanza e tancan giaga,  

furende pira,  prunitza e pubusa.

su costialvu chi pedit iscusa

a totoroju ca fit tropu paga               

sa nughe chi li deit cun su frassu,

olostris e ozastru tropu rassu.

S’amarantu chi giamat su cipressu

fozaligada chi asat su balcu

e su geraniu nde resteit pessu.

Su pigulatu sestende fit s’alcu

cun s’ervafenu, cando s’est arressu

pro ider ervaroca cun su malcu

chi li fateit corovul’e ferula

ca ofendeit chebuddita e nemula.