S'istrumentu de Meo Concheddu (traduiscione)

Oje frealzu, vintinoe, datariu

de millienoighentostrintasete,

poi de sete cuartos pius sete,

umpare a dotor Pi, regiu notariu,

pro cantu insiguru, su ch'isciaro

dispongo e cunfrimmo cantu naro.

Deo sut'iscritu Meo Concheddu, lasso

avisciad'abitudine paschida

a su nebode meu, chi si at vida,

non fatat che a mie, coglio e passo,

s'invece morit giro s'incumbentzia

a s'istitutu de benefaghentzia.

Lasso a umanos chena s'isperantzia

su tant'e bonu sensu e de criteriu

chi m'ajueit a non leare a seriu

chie preigheit in bida fradellantzia,

e poi fatos sos contos in taulinu,

ligheit Abele e libereit Cainu.

Lasso cussizu a Pepe camereru,

chi si chesciat de essere unu burdu,

de non chilcare babbu, tzegu o surdu,

ma siat onestu e lasset su misteru

pro render solu sos contos a Deu

si fizu de cristianu o de giudeu.

Ligo pudores de tempus antigu

a betzu professore moralista

chi pro coberrer porcherias in vista

isfozaiat alvores de figu,

ma a sa fine, restadu chena fozas

resteit muzere nuda cun sas bozas.

Lasso a Mimì sas pena chi m'atiat

cando enzeit a dare s'adiosu:

"M'as tropu cumpromissa, bellu gosu...

De li ogare fune, gia s'idiat...

Pepe ischit totu... no arrisches tudda...

(E invece Pepe no ischiat nudda.)

A s'avocadu Coa, mustro altares

pro biver chin sa massima prudentzia,

lassende-li sa "crisi de cussentzia"

chi selvit sempre a concluer afares

e ponner in mantessi beverone

siat su cumbeniu che-i sa cumbinscione.

A s'ecellentzia... (M'iscujet ammancos)

li lasso un'iscontriu pro inditu:

prite degh'annos faghet, poveritu

andaiat in chinca 'e chimbe francos

e como chi los at cuguruddados

non riconnoschet chie bi los at dados?

A Titziu e Caiu e totu sos macos

restados inconnotos dae su bandu

chi non leein postos de cumandu

lasso gustu, chi sian de se teracos:

asi a s'acabbu de sa pantomima

an a torrare macos che a prima.

A Mariu Pe, apoi su Cuncordadu

ch'est solu creja e criticas arresas,

li lasso, siat nadu chen'ofesas

suspetos de nos aer coglionadu

ca fit pius sinchèru tra manizos

cando daiat metanzos cussizos.

A portinaju meu ch'est suldu e mudu

cuntzed'e narrer comente la pessat,

a tzilleraju istrino chi resessat

in cussu inu chena aer iscudu

de legger veridades, salvu ciascu,

in fundanas de s'ultimu fiascu.

Lasso a Pedru azigu 'e dignidade,

mantessi cussa chi at s'atu mia

chi apenas faghet calchi porcheria

la coberit cun terra in libertade,

mentres tiu Pedru la lassat distratu,

bi ficat pes e fraigat su palatu.

Lasso a amigos, palatos in aria

chi fraighei in s'istratosfera

ue andei a bolu cudda sera

chin una principessa immaginaria,

fatende un'ateraggiu de fortuna

in mesu iscacaglios de sa luna.

A Arturu fradile ch'at isperas

sol'in medaglias de sa vana gloria,

lasso s'auguriu de piantare boria

pro biver e sighire camineras

chena bisonzu de insigne ameddu,

ma sempre a conca alta!

Meo Concheddu.