Muidas de gherra (Giangavino Vasco)

Gherra... e ancora mùidas de gherra,
chi de ùrulos prenan cust’aera.
Ischidada s’est torra cussa fera,
ca de samben sidida est issa ancora;
dae sa tana ’essida nd’est a fora
po tribulare torra cussa terra.

Su pruine sos carros nd’an pesadu,
oscurande unu sole semper frittu,
istudand’ ‘e sa paghe donzi appittu
po cumproare chie est pius forte,
ch’est prus capatzu a semenare morte
tottue, cun su coro isfidiadu.

E cuss’ómine it’est ch’at a pensare,
su logu sou ‘idinde bortuladu,
in terras ube aiat semenadu
paràulas de paghe e de consolu;
ca po nois teniat oriolu
e sinnos at chircadu ‘e nos lassare.

Fin ùmiles istigas de amore
ch’in pagas mentes, fortzis, sun bintradas;
sas àteras las an ismentigadas,
ca s’ódiu leadu nd’at possessu.
De tottu su chi tando fit sutzessu
est abbarradu solu su dolore.

Pòbera zente, pòbera sa terra
chi custos tempos malos sun patinde,
disamistad’ e gherra solu ‘idinde,
sighinde sas isperas istratzadas,
in dies semper prus disisperadas,
in mesu ‘e falsidade e cuntierra.

Ma fortzis un’incras at arrivare
chi sos gherreris tottus s’an arrèndere,
e mudines de paghe s’an’intèndere
in sas terras torrande a imbirdire.
In pópulos istraccos de suffrire
sas mùidas de gherra an a sensare.

E sos ojos infustos de resignos,
chi mai an bidu gosu,
an a tenner reposu
in nottes prenas solu de carignos.

Giangavino Vasco

29 dicembre 2008