Sa pius bella (Posta in rima dae A. Altana)

Una poesia de un'improvisadore egitzianu,

fata in onore de una bella in ricurrèntzia

de sa festa de s'agricoltura. Istrapulada dae

Remundu Piras in versos liberos, su 15/09/1975.

Posta in rima e (ispero) infiocada dae Antoni Altana su 29/03/2014.

Sa pius bella

Pius de un'amante, de s'isposa

e pius bella de onzi femìna,

che un'istedda deghile, divina,

cando in s'annu nou essit donosa.

Cavanas giaras, cun abbaidadas

atiras in ammajos de ispantu,

laras agnanghent bisos a s'incantu,

tuju altu tra duas arrecadas.

Su sinu, meravizas e atiros,

sos pilos che coloras chi ti ligant

didos che loto in petalos s'ispigant

e sos fiancos dignos de ammiros.

Sas ancas sun colunas chi t'inserrant

cussa tua bellesa pius manna,

onz'atera bellesa, faltza gianna

est paragone vanu si l'aferrant.

Nobile moer in passu signadu,

faghes coro meu isciau tou

solu pro unu asu dadu a prou

in una note ebbia, ammachiadu.

Biadu cusse chi pro sorte leas

dendel'abbratzos in notes intreas.