Ninna nanna de Anton'istene (Antioco Casula)

A Luisu Falchi

Ninna nanna pizzinnu, ninna nanna

ti leo in coa e canto a duru duru,

dormi pizzinnu dòrmidi seguru,

ca su cane ligadu hap’in sa gianna.

Babbu tuo de pena nd’est pienu,

cant’est pienu s’òrriu de trigu

ma tue dormi come in logu aprigu

cun cara tunda e animu serenu.

Si malos bisos faghes in su sonnu

tue non timas, nè piangas mai,

cando t’ischidas t’ischidet mamai

nèndedi contos de nonna e de nonnu.

Unu caddittu t’hap’a comperare

cun sedda bella e cun frenu de oro;

des andare in Caddura e Logudoro

e tott’a tie den invidiare.

Ti ponz’a coddu soga cun fosile

e duos canes ti peso pro cazza,

canes de Fonne, canes de arrazza

pro ti fagher difesa in su cuile.

E poi ti regalo elveghes chentu

e una tanca tottu fiorida,

una este de pannu colorida

e t’accumpagno finz’a Gennargentu.

Dae nie des bider custa terra

sardignola chi amo e des amare

sas lineas lontanas de su mare

s’isplendore lughent’e dogni serra.

Poi ti do una fortuna manna

pro chi mai in sa vida hapas dolore.

A la cheres? M’iscultet su Signore!

Ninna nanna pizzinnu, ninna nanna!