interinada (Altana)
poesia
30.06.2009
Di antonalta
Solu sas aeras sardas poden istratzare dae coro, sentidos delicados pro descrier interinadas de ammiru.
Un'ammassu 'e fiama in ruju grogu,
carignat lampizadas de biancu
impurpurende subra e a fiancu,
tintas diversas dae mantessi giogu.
Pinghet de chelu su biaitu inghiju
incanaladu in s'umbrosu isfrancu,
lassend'ijones a su coro iscancu
e dende a s'unda s'aciobadu ispiju.
Incantu fissu tra umbras allughet
e ponet donzi coro in fuas d'ammiru,
suguzat vista, miminat respiru
e mente atraet a cantu ammaju giughet.
Tessit in giru trama geniosa
chi sa natura li dat e li mudat
e tra su chi atzendet e istudat,
su rar'oldinzu indorat amorosa.
Impaporadas addes, moddes serras,
isfarinat cun prellas sos lampizos
comente e mama posta tra sos fizos,
andat a cuntentare ateras terras.
Condividi post
Per essere informato degli ultimi articoli, iscriviti:
/https%3A%2F%2Fassets.over-blog.com%2Ft%2Fcedistic%2Fcamera.png)