Ischidadu

Muidas, fruscios e tzocos in orija,

frimmende in cheas umiles pupias,

rifletian sas lichidas labias

covecadas in subra sa cadrija.

A boghes altas ispinghende gianna,

omines orioados intendia

e a coas de mamma m'astringhia

chilchend'ojada chi s'isprammu ispanna.

Su muculu in sa capa tremulende

azulaiat s'umbra minetosa

de una bete corruda mariposa

chi la fit de continu arrodiende.

Poi cun sos ojos a s'aberi-tanca,

idei una conca massacrada

e una forte manu annerviada,

ch'istratzaiat pilos cun sa franca.

Su gridu mi ch'esseit a tota uca

e oltulei mudantes dae sa canna

e mamma a mi coglire afanna-afanna,

mandeit in su brajeri fusu e ruca.

Cusso assalcios, como sun diversos,

pro cantu ancor'ispinghen betzas portas

e sas antigas umbras, torra isortas

sun muidende cun bolos aversos;

Non lassemus chi cuddas mariposas

benzan Arpias pro nostras incunzas,

ma muden in erinnis cun sas frunzas

pro pagare sos mastros d'afoghizos;

fatende nidos in cheas de chizos

pro cumprender iscenas terrorosas.