maridu e muzere (Altana)

maridu

Ello, como dias cherrer de m’ochire

ch’apo tratesu azigu in su tzilleri!

Ite creias, d’esser marineri

imbarcadu pro ponner pes in Cina?

Abbà chi non ses pius puddighina

chi dees calcariare pro ciochire. 

muzere

Non ti oco, non b’ido su bisonzu,

ciochende vida ti ses a sa sola

mi ghi gia ses iscarpa cun catola

e faghes passu preghende non ruas,

non de che fagher in Cina sas fuas,

ma raru giughes a puddas agonzu.   

maridu     

Ma cantas tuddas tirat cussa colza?

Ite portone cheres giaitare?

o sun sos tzoos chi deven ferrare

sos tonaresos caddos castanzeris?

ite diaula, mancu sos alveris

an tantu gai limba che resolza.  

muzere

Comente a limba mi, non nde faeddes,

ca bi pones in peus tristos fatos,

e totu cuddos chi paren distratos,

in bidda sun riende a donzi essida,

peus ancora a sa recuida,

pro cantu tue a su entu apeddes.

maridu

Ma fiza de…  non mi lu fatas narrer,

mira chi ancora non los apo in brou

cussos cherveddos  chi a bisu tou

faghen rier sa zente cun apeddos.

Tue a dedie ides isteddos

e de macas ighinas crees su parrer. 

muzere

Lassa non mi bi ponzas in apretos

e mantene in buca sas bulliscas;

ca si tocare mamas tue arriscas,

aberzo totu su sacu pienu,

ca una tzelta, misciaiat s’alenu

cando pisedda faghiat sos letos.

maridu                                                        

No creo , unu passu ‘e veridade

t’apat contadu mai mamma tua.

Fors’isperende de restare crua,

faghiat  cun sa limba foghilones

comente faghes tue cun sermones

chi buluzos, afogant un’anade.                

 muzere   

Tue si, funtana de sientzia

ischis de vida totu sos oldinzos,

lassend’in sos fiascos menzus pinzos

e a domo carrende solu ruddas,

poi, faeddas de tzoos e tuddas,

iscantonende pur’in s’insolentzia.    

maridu

Iscurta bella mia, it’as cumpresu

de s’omine chi  as como de fronte?

Deo non so cussu bramadu ponte

chi traesare ti faghet su riu

cun totu sas incunzas de s’istiu

pro passare s’ ierru, l’as intesu?  

Muzere

Tue s’incunza faghes in atunzu

e raru t’istajonet in chentina,

ca ispissu bi restas a chijina,

gai chi b’istajonas solu tue

e frecuente a su pesarue

chin s’asa de sa broca sempr’in punzu.

Maridu

Tando ses tue ch’innestas e tzapas,

catigas, isalmentas e supressas?

O so deo chi fato sas arressas

de mesa die in sa parruchiera?

pro chi totu ti miren in carrera,

poi chi trintas euros ti papas.

Muzere

Emmo, gia ses tue su disgrasciadu

chi giughes subra palas custa domo.

Solu cussu chi so prancende como

est pro ti preservare culu netu.

Chie tapulat, chie faghet letu,

chie puddalzu o porcu aproendadu?

Maridu

E custu tiat esser su suore

de sa pesosa prancia, de un’agu?

O pro tender mudantes perdes giagu

e a ti mover cheres portantina?

Mira chi como, puru sa reina

at abbasciadu s’antigu tenore.

Muzere

lassam’istare reales e contes,

esseres assumancu contoneri.

Pro fizas e pro fizos, furisteri

sempr’isteis, ma bragas cun anzenos,

e a mie torrende sos velenos

pro lagrimare mares subra montes.

Maridu

Deo non pisco in pojos cun sa lua

ne mai cun fizos t’arrisei abbojos,

e como lassa in pasu cussos ojos

in mudantes asciutos bagna bagna.

Si no, benis in binza, ca sicagna

nos est coghende premedia sa ua.

Muzere

lassam'istare custos moimentos,

chi tantu non isparit su dolore

che-i sas tuas promissas d’amore

chi fitianu ses ismentighende,

e deo chi mi so abituende

a viver cun antigos sentimentos.

Maridu

Su sentimentu, chi sas bascias oghes

oramai su tempus li assignat,

non fuet, non si mudat ne s’indignat,

pro cantu medas bortas trascuradu

che-i cussu mucadore ch’as pranciadu,

si no ispostas prancia, ti lu coghes.