carignos e lotas (Altana)

Non b’at carignu pius delicadu

de petalu chi rosa, dad’a s’abe,

nendeli chi s’astringat

e su dulche si lingat

de frisca giagadura, su melaghe

misciu cun sole chi ad’aribbadu.

S’unicu piaghere l’est chi lasset

tra pilos suos sos grogos puntinos

chi de semenes fatos

pro cunfrimmare patos

de s’amore pro totu sos bighinos,

prima chi gioventura si che passet.

A  si difender, ispinosos grumos

bogat pro no finire che pastura,

o siat istrobbada,

ca sa pius prejada,

naschet pro ammiru a s’ermosura

e dare cun colores sos profumos.

Gai  sas vida nostra fin bistada

Fata de sutzos dulches chentza lota,

si che-i sa natura,

lassende s’impostura,

innestaiamus sa paghe connota

a gherra trista e iscellerada.

Puru fulcadas limba de sos furbos,

chi naran bene de su ch’an gherradu,

dian aer forchidda

pro leare s’ambidda

impitende su carru non armadu

e chena sa potentzia de sos turbos.

At a benner sa die, malefadados

cumprendan bene ma est tropu tardu

a ultimos cozones,

pro chi sian ricones

chi an chitidu chena riguardu

mantessi mama chi los at criados.

Non b’est s’ispera de mundu in afitu

pro sa terrena brama,

c’alluta sa fiama

nemos frimmat s’umanu apetitu.