A Paulu Pillonca (Altana)

Ringrasciamentos mannos dae coro

 sintzeru devo dare a custu sardu.

Omine de istima e de azardu,

chi a limba sarda sestat camineras;

non solu insinzat cussas furisteras,

ma dat a sardu resaltu e decoro. 

Pagos bi nd'amus de alta cultura

ch'istrinan  chena pasu tant'ischire 

cun brama frimma de poder porrire

prellas antigas e ispintas noas

a custa limba ch'est falende a doas,

ca contifizu li mancat e cura.

Non dae meda l'intendei repente

chi torren custa limba a sas iscolas,

ma tantos sun sos mastros in catolas

chi de sandalu an limba ismentigadu.

Pro cussu, bramat siat contivizadu

prima pro se, poi pro su dischente.

Nois totu plaudimu custa zente

ca meritan istimas e onores

e si de custos fizos benidores

dian bider in iscola su faeddu

chi at intesu sempre a su manneddu,

diat eser sa grascia pius lughente.