vittorio Arrigoni (Altana)

  Un annu faghet, prima chi l'aren ochidu, iscriiat :

«Raru chi bombas ch’enin dae chelu,

distingan Hamassinas sas banderas

ne de Fatah vessillos, ne osseras

ammuntonadas in su tristu telu.

Issos lis naran chirurgico zelu,

ca salvan (naran) domos furisteras.

Ma chirurgicos sun pagos dutores

Chi segan pro chi sian males minores.

Segan a boltas, ancas chi podian

Salvare intro salas atretzadas,

ma frecuente enin bumbardadas,

gai chi puru curas impedian.»

Custas istein paraulas nadas,

chi totu sas natziones intendian.

Ma prestu sos poderes mundiales

b’ana mandadu a pascher sos mannales.  

Custas notiscias nos las at sestadas

Arrigoni, pistende calchi pe,

fintzas chi l’acusein de piscadas

a fura in su mare de su re

e l’arrestein minetende: «Ebbè?

Prite non torras in natias cuntradas

a faeddare de sas bostras gulpas,

si no, innoghe che lassas sas pulpas!»

Cun tale modos paren impitende

su chi subbein issos a Dachau,

ch’in pagos an isoltu cuss’ispau

e tristu restu biven trajinende.

Ateros sun sos fizos informende

pro evitare cras tale ludrau.

Ma sos bisonzos de sas terr’anzena,

letzita iden s’istranza granghena.

Como ischimus de babbos Abeles

e fizos cun sas iras de Cainu

chi an usadu odiosos feles

pro armare su pudidu assassinu

de un’armadu de pinnas e teles

e banderas de paghe pro caminu.

Ponide, ebreos, sas fuas a codiu

mi sun mudende lastimas in odiu.