Protu Stara de Uddusò

Proto Stara

(XVIII-XIX seculu)

Originariu de Uddusò, viveit tra su 1700 e il 1800.

Supurtadu da una bona istrutzione, si riveleit unu

bonu poeta.

Reina de su monte de Carmelu

Reina de su monte de Carmelu,

de sa zeleste Corte imperadora,

sias nostra avvocad’et protettora,

suppostu chi sa vida est una gherra;

a sos chi t’adoramus in sa terra

e ti tenimus pro ghia et pro norte,

assisti nos in s’ora de sa morte

pro t’adorare allegros in su Chelu.

Reina de cust’altu et raru monte,

prinzesa de sa Corte zelestiale

e allegria de bida mortale,

istell’isclaressida in s’orizonte,

sa ch’hat postu pè subra su fronte

de su dragone barbar’infernale,

bisonza’ ch’a sos astros mi remonte

pro laudare a tie senz’uguale.

In sas intragnas tuas sias ispera

de sa lughe o Virzin gloriosa,

chi ti at elevad’in alt’isfera.

De s’Ispiritu Santu ses isposa

e de su babbu sa fiza  eredera.

Cantu es bella in Gerico sa rosa

naschida in fiorida primavera,

ses Tue aggrassiada de manera

chi ses de ogni coro triunfadora,

istesti pro reina post’a ghia,

cunzetta senza macula nisciuna,

dama perfetta de su sol’estida.

A basciu de sos pes portas sa luna;

corona de istellas guarnessida

t’hat dadu sa deidade trina et una,

e tue istesti sa remediadora.

 A causa de Eva sa travia

s’inimigu perdesit sa cadrea

sende in sa pius alta gerarchia,

Micheli vittoriosu in donzi era

castighesit s’orgogliu de Osadia;

su leone animosu de Giudea

in brazzos tuos naschesit o Maria,

da annos in sa vida, lughe e ghia.

 Unu casu referint sos annales

sende ancora in su mundu Sant’Elia,

chi pro dare gastigu a sos mortales

tantu tempus su chelu non pioia’,

et pesasi una nue in forma tale

chi bestesit sos campos de allegria,

pro m’esser incontradu mi cheria

a t’ider in su mundu abitadora!

Pro m’esser agatadu, istella jara,

a mirare perfessiones tantas

dia haer postu sa mia indigna cara

ue ponias sas sagradas piantas;

in custa trista vida nos ampara

tue chi sos affl ittos attelantas,

reina ses de santos et de santas

et gasi ti venerant e t’adora’.

Sias nostra avvocada et protettora

reina de su monte de Carmelu.