BARORE SASSU "Limbamala"

Chi so sassu mi anto e so cuntentu

e non m'est sa natura istad'avara:

a sas tempestas non cambio cara

ne mi tremet sa muida de su entu:

sos parentes los apo in Gennargentu

e bi nd'apo in sas rocas de Limbara,

sa Sassu, parente a su granitu,

resistente a su caldu e su fritu.

Una olta critichende sa oghe tenorile de Zizi:

Istanote che nd'amus de armonia

a modulatzione de frecuentza,

como chi s'an bogadu sa lissentza

sos poeteddos de sa baronia!

Ajò chi poesia est poesia!

Cue puru ch'est ruta sa sementza,

e de su entu sa potent'iscossa

nde l'at batida a sas terras de Mossa.

Chin Piras sempre amigos e sempre aversarios.

A dagh'ides a Sassu e a Morete

lassa, Remundu sas fanfarronias:

deo non naro chi non ses poete,

deo non naro chi poete sias...

Su machin'est de trintases zenias

e tue l'as leadu 'e trintasete!

Caru Remundu non fetas abusu

si ti nd'at regaladu un'in piusu.

Ma Piras li rispondet:

Limba pudidinosa, puite tzarras

e non t'ammentas de su trintanoe:

intradu ses gherende che un'eroe

in chilca de sussidios e cabarras:

sun giustamente ses annos a oe

chi sos cascos guastu t'an sas barras:

l'isco chi pro sos cascos non ses mortu

però nde ses restadu barritortu.

E ancor in duinas, PIRAS li narat:

Barore ses pienu de maliscia

chi non cheres bogare poesia.

E SASSU:

Sa tue est meda peus de sa mia

chi non ch l'ogat mancu sa giustiscia.

Sas contierras de Sassu chin piras, faghe narrer a Tucone:

Si bos betades manu, a sos concluos

sos punzos malos sun, ite los crêse?

Nde li das unu e ti nde torrat duos,

faghe s'addissione e sunu trese;

unu nd'agnanghes a sos punzos suos,

duos ti nde dat isse e sunu sese;

naram'ite conchista nd'as in cue

daghi nd'at duos isse e botor tue?  

Difendende s'arte contro a PIRAS:

S'arte at fatu sa perforatrice

sa chi faghet sos montes apianu:

s'arte at fatu sa trebbiatrice

chi nde chirriat sa paza dae su ranu;

s'arte at fatu sa mitragliatrice

pro nde distruer su gener'umanu;

fatu at velas e naves a motore

e machinas chi andan a vapore.

E PIRAS difendende sa natrura li rispondet:

 Leadi unu pessighe in s'istiu

ruju o biancu siat in su dossu

e cando l'as abertu a biu a biu

in mes'a issu b'agatas un'ossu;

ogande s'ossu e bi restat su fossu,

aberi s'ossu e b'agatas su chiu;

custa non est de s'arte sa fatura

ma opera e prodigiu 'e sa natura.