Birde sa tanca mia (Giovanni Fiori)

Duas cositas pro narrer sa mia 

ammirascione pro cantu as iscritu.

Non est pro nois solu insinzu ebbia

ma ijone de deris cun s'inditu

de si godire alta poesia

puru cuddos de cras chi sun apitu

a leare dae te bases a prou

pro nd'aer limba un'alidu nou.(Altana)

Giuanne Fiore est naschidu a Itiri in su 1935. Sas orizines de massaju ana apidu parte manna in s’achivire sas connoschentzias limbisticas de su sardu e in su mezoru da sas proprias isperientzias umanas chi si refletin fortemente in su brotare poeticu.

Birde sa tanca mia! ‘Irde sa tanca
 ìnnida ¹ e manna e pàsida in sos littos.
Brincan tottue attattos mannalittos. ²
Un’iscaccàgliu ³ ‘e pappàiles rujos...
Curride! Oddeu! Allummados restujos
in-d un’isprammu⁴ ‘e chijìna bianca.

Birde su coro ‘e sas chimas attesu
ue s’élighe trìnnigat ⁵ e riet.
E chena pasu in sas olias friet
sa chìgula 6 arrughida ⁷ a sole altu...
Nudas rughes nieddas in su saltu
mudu pedrale in-d un’inferru atzesu. 

Birdes sas undas largas in s’istiu
lìmpias e chietas ninna-ninna.
A chenadorzu ⁸ sa chedda ⁹ pitzinna
atzendet s’ ‘adde de ‘oghes e sonos...
Disisperados mùilos ¹⁰ che tronos
falan subra sa braja fintz’a riu.

Ma como iscùltami! Istranzos de fora
e isterzeris ¹¹ pàschidos inoghe
suore e samben e ispera e boghe
pro ti render isciau ¹² ti ch’han suttu.
E han sas linnas che faddija ¹³ alluttu
pro tempos e tempòrios... E ancora.

Iscùltami ‘e nou. E non ses tue
Probàina ¹⁴ ‘e custa terra beneitta,
tue ch’has bidu sa carena fritta
e frade tou in sa chijina calda
fizu de cust’antiga terra salda
ch’indonu¹⁵ pedit lùttios ¹⁶ a sa nue?!

E duncas beni. In punta ‘e sa calanca ¹⁷
su chercu isparghet bélidos de fogu.
Pèsadi che ispada in dogni logu
e ondra ¹⁸ sias e fidele amparu. ¹⁹
Millu torra su sole addae giaru!
Birde sa tanca mia! ’Irde sa tanca.

____________________________

1 ìnnidu - integro, intatto.
2 mannalittu/os - animale (agnello, mucca, capra) allevato in casa con molta amorevolezza.
3 iscaccàgliu - scroscio, effetto sonoro fragoroso.
4 isprammu - spavento molto forte.
5 trìnnigat, trinnigare - scuotere leggermente.
6 chìgula - cicala.
7 arrughida - rauca, roca.
8 a chenadorzu - l’ora in cui, in particolare d’estate, il gregge, verso il tramonto, viene portato al pascolo.
9 chedda - qui, piccolo gruppo di animali.
10 mùilu/os - mugghio, grido.
11 isterzeri/s - espressione sprezzante verso chi si asservisce a poteri e interessi estranei alla propria terra.
12 isciau - schiavo.
13 faddija - qui, focolare, “cenere accesa e viva”.
14 probàina - propaggine.
15 indonu - invano.
16 lùttiu/os - goccia, stilla.
17 calanca - dirupo, voragine.
18 ondra - qui, difesa, tutela.
19 amparu - riparo, sostegno, protezione.

Premio Speciale della Giuria al Logudoro di Ozieri, 1990