Salinas (Paola Alcioni)

Assoliendi in sa spunda 'e s'istadi
apu trisinau passus notzentis
in s'oru 'e una salina streminada.

Unda morta, logus de solidadi...

Fradi, is ogus
chi ariseru in s'arta

 barandillia t'ant arrisiu,
(barriera)

ant connotu pesadillia e prantu.

                                   (incubi)

Imoi sunt cantu 'e sderruta
chi a fogu mi sinnat sa cara
abruxada
de is bortas chi seu arruta
pesendimindi bianca de sali.

Aperdada spera...

Fortzis cras ant ' essiri bandera
in su bentu, luxenti 'i avolotu
a sa strossa 'e sa terra stimada,
tzerriu de feli di aciotu
a s'astori chi improsat sa cria.

Ma òi sa manu mia
a sa fraci abbrigada 'e su bisu
s'est alliagada. Tui, fradi,
mi dd'as sanada, torrendimì
s'arrisu e spartzendi
s'amori po su matessi frori.

E si in sa cara intzertas
repentina callendisì
un'umbra 'e scuriori,
no ti domandis
cantu acua 'e salina
ingenugada ap'a depi bufai
finas a mi pertungi pramu

e laras
e cantu caras ap'a pagai
speras giai sicadas
in su maladitu sidi perdali
de custa marigosa
lacana 'e sali.

1° Premiu otieri 2003

Assoliende in s'ispunda de s'istadu

apo trazadu passos innotzentes

in s'oru de una salina islacanada.

Unda morta, logos de solidade...

Frades, sos ojos

chi erisera in s'alta barandiglia

tantu an risidu,

an connotu ammutos e piantu.

Como sun cantos de binchidas

chi a fogu mi sinnat sa cara

brujada

dae sas bortas chi so ruta

pesendeminde bianca de sale.

Apedrada ispera...

Forsis cras at a essire bandera

a su entu, in abolotu

e sa disgrascia de sa terra istimada,

giamos de feles de biasimu

a s'astore   ch'ingannat sa cria.

Dedeoi però sas manu mia

a sa falche caente de s'ijone

s'est assemada. Tue frade,

mi l'as sanada, torrendemi

su risu e partende

s'amore pro su mantessi fiore.

E in sa cara intzerta

repentina, falende-bi

un'umbra de iscurigore,

non ti domandes

cantu abba salida

imbenujada ap'a deper bufare

finas a mi pertungher prammu

'e laras

e cantas caras apo a pagare

isperas gai carasadas

in su maleitu sidis pedrale

de custa ranchida

lacana de sale.