Duos coros (Altana) Siniscola 2013

Abbratrzados nos tocat s'impuddile

suta tebios carignos ingroghidos,

sos coros chin sas laras aunidos

traessan s'infinidu onzi segundu,

ambos innamorados de su mundu,

godende sos profumos de abrile.

Sa frina cun abbratzu delicadu

nos batit friscas primas armonias,

cantigos de olantes melodias

e festas rimbumbend'in donzi muru,

indulchende disignos de venturu

ricamados de bissu e de brocadu.

Meilas de annijas in suguzos

trinnende a sonos dulches sas ischiglias

ti dan a sinu tremidas puntiglias

chi m'apozas in coro pro arrundos

e ceo olende in chelos profundos

conto de te a isteddos chiscuzos.

Lis naro chi de rosas un'isfrunzu

miscein cun lizos pro ti tingher cara,

nenniri chin peonia pro sa lara

cun sos petalos rujos de sa chessa,

sos pilos tintos chin sa murighessa

e ojos colorados de atunzu.

Lis conto cantas penas si non t'ido

o su biver chin tegus chi mi neghes

ma paradisu, solu chi mi preghes

carignend'a ti dar'unu carignu.

Lis conto chi sa vida a tot'impignu

perdo si pro un'atimu t'olvido.

Lis mustro coro e gioja mazore,

in afetos ligados de istima

comente ligat terra sa marina

comente ligan astros sas aeras,

comente pro venturu sas isperas

las ligat fissas custu nostru amore.

Lis pedo infines ite poto dare

pro cantu bene m'intregheis in petu,

Issos m'an nadu: "Agnanghe ater'afetu

e sighide asie a bos amare.

bidide puru (altana my blog)