Salvatore Corveddu (nomadu grolle)

Originariu de Nughedu San Nicolò, massaju,

si est frommadu dae autodidata, madurende una

profundha vena poetica subratotu in sas

descrisciones de su dolore de s'omine e de sa terra.

De filone poeticu tradizionalista, at otennidu medas

riconnoschimentos a su Premio Tzitade de Otieri, a su cale

at partetzipadu fintzas dae su primu annu, in 1956;

de signalare, pius che ateru, su segundhu premiu in su

1961, su montovu d’onore in su 1965 e su montovu

ispessiale d’onore de su 1967.

At ajuadu meda pro sa rivista S’Ischiglia e at otennidu

pro duas bortas su segundu premiu a su cuncursu

S’Ottava Bella de Otieri, riservadu a sas poesias in rima.

Bos ponzo, Pagas poesias suas:

Rimpiantu

Cand’ancora in erva fia,

lontanu da ogni affannu,

sa vida unu bene mannu

pro contu meu creia.

Tottu pro me fit divagu

in cussos annos serenos:

males mios e anzenos

m’interessaian pagu.

Ma custu caru tesoro

in breve lassadu m’hada.

Cantu prestu ses passada

pro me pizzinnia d’oro!..

Già sos pilos imbiancan,

prima corvinos e raros:

tristos signales e giaros

de sos annos chi mi mancan!

Como ch’es mesu isvanida

rimpiango a s’infinitu,

ca pro me senza profittu

si ch’es passende sa vida.

Tantu ’ene ’ido a s’assegus

chi m’est fuende ogn’ispera.

Oh! si torrare potera

vint’annos addaisegus!...

Sa vida calchi pisedda

m’hait zertu allegrada.

Sa domo non fit istada

goi deserta e niedda.

Troppu forsi hapo s’amore

a sas istellas alzadu.

Non sanat s’infortunadu

peruna cur’ ’e duttore.

Ma chie l’ischit si fia

istadu mezus o peus?

S’ès beru ch’esistit, Deus

lu diat ischire ebbia.

Ma si a su fadu mai

nisciunu si podet frangher

s’ancora devo piangher

dèd esser iscrittu gai.

Suore e lagrimas

Est torradu s’istiu. In s’infogadu

Limpidu chelu, una nue non b’hada;

Su sole imperada; sa ghigula aumbrada

Cantada a totta oghe; in sos laores

Assistidos, o no, sos messadores

Sun dae subra cun su ferru arcadu.

Est tempus de messera. In ogni sartu

Est già sa fanche in ballu. In sos restugios.

Che seminados, s’iden sos manugios:

Sede presu e isortu e bona parte

Accattastadu in regula de arte;

Atteru in su messadu ancora ispartu.

Sun sempre custos, cuddos chi hamus bidos

Dare sementa e anima a sa terra,

C’aman cantu s’isposa, in santa gherra,

Cunsacrados a issa, peddes mortas;

E incunzan sospiros, tantas bortas:

Sonnos de abbundanzia isvanidos.

«Cust’annada est mezzana; su laore

Chi fi di a ervas de promissas riccu,

A mesu ranu e senza ranu est siccu»,

Isclaman cun dolore, e a messare

sighin a coro tristu, ettende a pare

lagrimas in bundanzia e suore.

Su semenadore

Sende pro dare cun suore nou

sementa noa a sa terra, c’haiat

già preparadu: «santa s’ora siat»

narat, cun s’oju in alvu; in sinu sou

intrat a giungher; si sinnat, intantu,

sa manu dritta alzendesi a su chizu:

In numen de su Babbu e de su Fizu,

de s’Ispiridu Santu...

Tulat e torra si sinnat: a rughe

isparghet sa sementa a larga manu,

rosariende; in aria su ranu

brillat che giaos de oro a sa lughe.

A sa ’oghe su jù partit serenu,

in tira e drittu, paret battijadu:

s’alvada affundat, imberghet; s’aradu

andat e torrat a surcu pienu.

Suerat su mischinu postu in pija.

Premen sos boes inarchende tuju

in sa terra afferrada; a un’ancuju

si faghen sa carena in sa cadrija.

Fumat sa terra no ancora fritta

in s’umidu manzanu: (est su selenu

pesadu e postu in fua). In su pienu

ispuntat sa pianta beneitta.

L’ammirat su massaju, e in coro sou

la beneighet; li paret, s’odore

chi sa terra tramandat, un umore,

chi consolet: profumu’e pane nou.

E isse intantu sonniat s’alzola,

a notte che a die, in contivizos:

sos boes, su laorzu; e isposa e fi zos

regoglidos in una ispera sola.

Su zappadore

Inue, sempre cun lanza fortuna

s’opera rendet, cun gallosa manu

zappat e zappat, dae su manzanu

a tardu sero; a bortas a sa luna.

Guasi a tempus de segundu affundat

su grae ferru: surdu unu rumore

sighit su mottu: calidu suore

in sa cara, che lagrimas, l’abbundat.

Zedit sa terra a su corpu: la tirat

e interrat su semene: l’est caru,

chi no li ’essat astrintu nè giaru;

l’amminudat, la pulit, e la girat.

E gai totta vida, a s’alza e fala,

gighet in brazzos, a su pista pista,

sa rughe sua de attarzu, trista,

a duas attas: una morte mala!

Cando su sero recuit, chi appena

reu si podet mantenner, in logu

de haer calchi sollievu, fogu

si bastat no agattat e nè chena.

«Cust’est sa pena mia, est su castigu

de ogni zappadore, chi a sigherru

tirat e campat, barriu ’e ferru,

narat: che cundennadu a vida antigu».

S’isat, cando si dormit, in su campu

consoladu ’e pane, in sos laores

bettados e regortos a motores

e cun paga fadiga; e tottu a lampu.

Ma sun sonnos ebbia: ’idet chi ancora

su zappu lu persighit: abberit

sa sèpoltura sua, e lu coberit

sa piedade umana a s’ultim’ora.

Usos chi sic’andana (s’arzola)

Ingullidu su mossu, in totta presse

a su bancu ’ettan manu; accò su sede

a su pedrale, in cantu no si crede,

ispartu in giru, in drittu e a s’imbesse.

Sos basones intantu a cussu puntu

ognunu a su giù sou (a su signale

de sa rughe fi dele) ’ettan giuale

e l’accuccurrat a sa pedra giuntu.

S’ischidat de repente unu fregassu

surdu ’e sede: e che in cazza russa

truvidas, boghes: s’usanzia èst cussa

pro allegrare a sos giuos su passu.

Imprimini in su sede, sas ferradas

ungias boinas; abberin camineras

pro contu sou ognuna e sas trazzeras

a chisciu, a essa, a zettas trobogiadas.

Brincat sa pedra, illorumat: sas biccas

sighin s’anca e sos giuos: sos iscuros

ch’essin che puntos a ojios maduros,

cun sas canneddas in sambene, siccas.

Trazat sede sa pedra; e in tottue

faghet fossu e muntone: a s’alza e fala,

che cando passet in nodera mala,

s’omine sighit a su pesa e rue.

Pro nisciunu b’hat pasu; si peleat

che cundennados: a duos a duos

si dan sa muda treuttos e giuos:

unu los lassat, s’atteru los leat.

Intrat s’iscoba, fattu, in attraessu

in s’ora giusta: a bula asciutta, alluttos

da-e su sole, giran sos treuttos

in s’alzola su sede in ogni essu.

A un amu, mujados, in suore

si solven sos meschinos: hai, tantu

costat su pane! forsi più de cantu

dulze siat hat ranzigu sabore.

Sun tottu in fi ne, istraccos e biancos

de lisca e de piuere; in s’ora

piùs calda ’e sa die, a limba fora,

passan sos giuos a battimu’e fi ancos.

Dat borta sero; pianu pianu

abbasciat sede: fi orit in mesu,

tra piuere e pazza e fogu azzesu,

che buttios de lambria su ranu.

S’arzola’est fatta; in s’ora, a su giù sou,

torrat ogn’asone; arressu in s’oru,

innanti chi a isgiunghere a su loru

’ettet sa manu, si sinna de nou.

Ultima pena: un’attera ancora

ispettorrada ’e sede, un isfumentu

ultimu de piuer de pamentu:

a faina comprida mastru fora.

Atteros annos mezus: nende custu

’essin derettos; han su passu appena:

in sa zinta un’imboligu; sa chena:

in forsi est tottu paris chena e bustu.

bidede puru (altana my blog)