Gustosamente m'adato (Antoni Pascale Delogu)

(XVIII-XIX secolu)

Originariu de Ittiri, fit analfabeta. Poeta

improvvisadore, nos at lassadu meda cantones

pobulares. Morzeit in sos primos annos de su 1800.

Gustosamente m’adatto

a sas pius opiniones;

si sos santos sunt ladrones

luego santu mi fatto.

Si sos santos de continu

pregana sero et menzanu,

et cun su rosariu in manu

mandigant a berveghinu,

et eo puru meschinu

fatto cussas orassiones.

Si sos santos sunt gasie

subitu mi fatto santu,

pro fagher aterettantu

lassade fagher a mie,

chi in cheja dogni die

baso totu sos mattones.

Si cun pedire devotu

sos santos faghent istragu

prite chi non cherent pagu

ca si che leana totu,

eo puru fatto votu

de ispozare persones.

Si sos santos in deunzu

de istare si cumpiaghent,

et bidu feminas faghent

dogn’oju cantu su punzu,

et eo puru a murrunzu

patto cussas tentassiones.

Si sos santos pro patire

cun disciplinas si ferint

et i sos ojos abberint

chirchend’ite remonire,

et eo puru sighire

cherzo cussas opiniones.

Si sunt sos santos pro fi ne,

santos comente los creo,

miraculos nde fatto eo

chi dent passare a machine,

et mustro chi m’incamine

a esser de sos santones.

Si sos santos sunt ladrones

luego santu mi fatto.