Sa chelva anzada (Altana)

Tiu Barore Tucone, puru essende ritesu dae totu, un omine giustu, est bistadu in aparentzia sempre isgrabiladu, siat inpublicu che in sa vida privada. Essende ighinos, passaiat de continu in sa carrera de domo pro andare a s'ortu.

Unu manzanu a bonora mentres passaiat, babbu lu frimmeit pro li domandare si aiat piantalza de latuca, comente fit usu tra sos ortulanos de si la prestare paripari, ma tiu barore oltende azigu sa cara li neit: "Ello Pepinè, umpare l'amus piantada"? Asi sighende sa caminada , lu lasseit che macu chena dare a babbu mancu su tempus de li narrer in cara, chi si la podiat brujare in palas, comente poi, babbu neit pianu, ma arrabbiadu nieddu. A s'ismurinada, fimus setzidos totu fora leende su friscu, cando s'ideit cust'omine cabulende acherra a babbu chin unu matule de piantalza imboligada a fenaile, nendeli: " Abbà ch'est cussa premedia; manigala prima chi s'ispighet! Babbu, riende li neit: Comente mi poto isdepidare tiu barò"? E isse sempre prontu e a malu grabbu: "Ma! si l'as in leada e no t'est mannu infadu, ati crasa o barigadu una chelva, però anzada!"

antonalta