Non bos benzat a conca!.. (Altana)

02.10.2009

Custa la fatei pro ponner in avisos tzeltas franzas de sa giunta regionale.

No mi paret politica pulida

de partidos chi oje sun a caddu;

ca nd'est bessende calculadu faddu

de ingannadora e faltza promitida.

Sa promissa chi mai tzentrale atomica

in sardigna de fagher mancu in bruglia,

paret como chi eleta ratatuglia

nos impazeit fauledda comica,

ca gia ana nadu:"Cherimus ischire

ite fine ada a fagher tal'iscoria."

A nois sardos bastat custua istoria,

pro ider coment'andat a finire.

Faghides trist'iscena de acioroddu

coglionende cun fartzos disacordos

e pessighende ischemas pius lordos

bo che l'etades dae pala in coddu.

Atentos, sardos, a custos gioghitos

chi su politicante nos preparat;

votamulu si faghet cantu narat

e isperdimu sos cozoni-fritos!