At a benner una die... premiu "Sardidade" 2012

                            ANTONI ALTANA    

At a benner una die s’istiu

a s’apru monte buju, carasadu

dae aeras lascas

e lentor’aggangadu,

suende fumu de mortal’afiu.

Boes marinos ch’iscorzolan ursos

mortos, ca soltu si lis est s’astrau.

Montijos afogados

subra cales su cau

assebestat in s’abba betzos cursos

de rocarzos cun nidos e intanos

immerghidos tra bromas in oldinzu,

plasticas e isciumas,

iscafos in ruinzu

bantzigan tra fiados e umanos.

At a benner una die s’atunzu,

isfozu de atomicos inghijos;

bullos d’abba uddida

che chibberos cabijos

chi bombitan sa peste cal’aunzu

a triminzones nuados d’inferru,

frunende  alas che trupas d’acabbu.

Custu, mamma mi neit.

Custu mi neit babbu.

At a benner una die s’ierru

a sos de crasa, chentz’avertimentos

e chentz’arrundos pro frenar’arriscu

chi miminet o mudet

de su giardinu friscu,

muntonarzos de ruddas e cimentos,

pro trobojos e perfidos  manizos

de macas bramas chi non dan’iscanzu

a mulgher  su ‘e pius

de custu sinu lanzu,

mascherende cun luas, tristos lizos.

Solu si fortza paris dan in liga

at a benner una die s’eranu

chi  manigat sa paza

pro madurare ranu

intro dorados nidos de s'ispiga