A s'iscurigada (Baudelaire)

Complitze de rebeldes, mi, gia sa lebia sera

a passitos de lupu acudit che una ladra;

lentu si tancat chelu, che grande isterrimenta,

e una fera in s'omine si moet, abbramida e noa.

O dulche sera, pannu de chie, non cuat,

sos isballados bratzos mirendesi, podet narrer:

"oje s'est tribagliadu", tue chi ischis cossolare

animas tribuladas dae sas penas pius ranchidas,

s'operaju revessu chi gia mujat sos chizos,

s'operaju chi muju torrat a isterrimenta!

Pesantemente, intantu, in aeras grefas de bujos

diaulos s'ischidan che-i sos bancheris,

e tra iscuritos e cobelturas a sa tzega si etan.

In carreras, tra lumes chi sa bora turmentat,

s'allughet su Meretriciu, e s'iscavat, a manera

de unu frommijalzu, milli labirintos e arrundos,

abbelzendesi totue calchi aidu cuadu,

comente cabulat in s'umbra chie achivit altura,

e in coa de ludu de sas biddas marturiadas

a s'acua movende-si, che-i s'elme in su pane.

Innoghe e cuddae s'intenden coghinas a isalenu,

e muilende teatros, e orchestras a ruscida;

como; in combuta, ponen tramposos e bagassas,

su pê in locales ue su giogu, sas suas giojas cuntzedit,

mentres ladros, chi no an posa ne lastima,

oldinzan issos puru, e pianu ispinghen

e fortzan sas portas e illichidan casciafortes segadas,

pro biver calchi die e bestire s'amante.

Tancadi in te in custu nodidu mamentu, o mia anima;

ignora gridos chi pigan dae sa via.

Custa est s'ora chi acreschet ispasimos de male,

e de suspiros e supos pienat s'ispidale,

cando su comune isperrumu a unu a unu ingullet

sos morentes, abbrancados dae mischina note.

Mai pius pro issos, a sera, nuscosu manigu,

ne, acurtzu a su fogu, una cara de femina in s'istantzia...

De su restu, sos pius no an mancu connotu

su bene de una domo, no an mai bividu.