Banda in bon'ora (altana)

 Band'in bonora fizu, torra sanu                     

dami s'abbratzu tou, dami s'alenu,

daemi-lu forte, nebidu, pienu

che-i cuddos chi daias cando partia,

de biu vigore fatos, chi podia

bincher sas lotas chin sa nuda manu.

Lotas chi como in me fissas s'istringhen

cosidas ruzas chin su filu antigu,

chi si rimbumbat su deris amigu,

solu s' intragna mia nde leat cumpresa.

Ca su chi como a coro dan intesa

non sempre sun s'immagine chi pinghen.

Iscrie sempre ma in poesia

ch'est sa chi abberit giaes de su coro,

pro cantu fama no est pius decoro

comente connoschia in tempus meu.

Beru, cheriamus totu, s'empireu

ma cun sa nostra solu fortza ia.

Non trates su suore pro sa lisca

ne pro tabbacos d'estru frailadu,

trata mente e coro inghiriadu

de fortza naturale; solu tua

siat sa barca dae pop'a prua,

ca solu tua est gai totu sa pisca.

Trata chin totu e sebera s'amigu

chi ti cumprendet cando non faeddas,

trata e rispeta sempre sas piseddas

cun sas maneras pius delicadas,

ammenta chi natura, ischirriadas

las at pro mamas de s'uman'ispigu.

Trata e cunforta sos isfortunados

ch'an de su viver, pius valores altos,

e imbolos d'amore pius ispaltos

puru mustrende sas alas mujadas;

sue dae cussas feltas indignadas

dissignos giustos e incarenados.