Realtade e Fantasia

Cuncurrente a Otavas Crurrende de Benetutti

1 - Realtade (altana)

Ateru tema ch'abbratzat sos sensos

non mi podiat benner che-i custu,

ca nuscu, tatu, intender, vist'e gustu,

oldinzos nostros abberit immensos,

dend'a s'umanu sos gustos intensos

pro mezorare su caminu giustu

e nd'aer su carignu e s'armonia,

ca como "Realtade" est arte mia.

2 - Fantasia (piga)

De duos temas in custa cicìa

unu ebbìa nd’agato solamente,

caru amigu mi lassas s’allegria

ch’est una cosa rara in su presente,

ca su bigliete narat: “Fantasia”

cussa ch’in motu ponet ogni mente.

Tue puru, ca ses poete ‘onu

cun issa già ses sempre a chistionu.

3 - Realtade

Es bellu fagher domos in aeras,

si lu ijonas fora 'e s'aposentu,

ma cando in giru miras donz'eventu

de tempus, de fiores e de feras

chi ti naran proites e maneras

de vida chi ti dat onz'elementu,

cue sa fantasia chi cuminigas

a realtade mia male bi ligas.

4 - Fantasia

Non nde fraigat domos ne palatos

ca giogat cun sentidu e galania,

de sa natura pintas sos retratos

de su tempus mi contas s’armonia,

ma mira chi sun contos male fatos:

It’est s’amore chentza fantasia?

E totu si che morit chentz’amore

ca mancat de sa vida su motore.

5 - Realtade

S'amor'est parte ia e d'est consolu

ma si lassat truvare dae frinas,

medas bortas afumat sas coghinas

e si nde riet de su fumajolu.

Sa realtade est unu letolu

d'astros in chelu e undas marinas,

de alvores, de padros e de montes

ch'induin folas de re, reina e contes.

6 - Fantasia

Janas chi faghen bella sa natura

non bi nd’at in sa realtade tua,

sas chi consolan ogni criadura

sas chi sos mannos s’isan a s’acùa,

ca sun issas cun fide e cun premura

ch’a ognunu dan s’isperantzia sua.

E non nelzas chi sun de pagu importu

già l’ischis chi sun prendas de cunfortu.

7 - Realtade

Fid'e ispera ch'in conca lis pones

sun contos de janas ispantosas,

ma realtade ghiat evolusciones

dende valores giustos a sas cosas,

iscobelzende pilu a mariposas

e in s'infinidu, noas costeddasciones.

Biden intro sas pizas cundensadas 

chena bisonzu 'e ninfas imbentadas.

8 - Fantasia

Est sempre in motu custu tema meu

iscurrizende in s’universu totu,

totue m’acumpanzat in boleu

nudda lu frimmat, nudda l’est ignotu,

connoschet solu gustos e recreu

e sempre sa Giustitzia at connotu.

Nara s’est gai custa realtade

chi pronta negat ogni veridade.

9 - Realtade

Gia s'ischit chi connosches s'universu,

ue leas fantasticos papores.

Gia s'ischit ch'indeoras sos amores

e impratas cun folas dulche versu.

Ma cando ‘enit su tempus aversu

chi negat pane a mannos e minores

non bastan tintas de prata e de oro

pro mezorare realtade insoro.

10 - Fantasia

Sa realtade tota ses bantende

nende ch’est issa sola su cuncretu,

ma cosa meda ses ismentighende

ca non fentomas manc’unu difetu:

b’est sa crisi chi peus est andende

e tassas sun betende pro decretu.

Mancu male chi deo a sos concluos

poto acontzare sos difetos tuos.

11 - Realtade

Cale concluos? Ite acontzas, ite?

chin sa tua fantastica isperantzia,

si imbalzu non b'at intro s'istantzia?

Deo acontzo chin su giravite,

s'aradu pro chi torret s'abbundantzia;

solu tando ti giamo chena lite

pro mi resare mutu 'e Padre Luca,

a tatza in manu e a pipa in buca.

12 - Fantasia

Non mi contas de gherras e bruturas

ne cunsideras sas isperas mias,

sun realtade imbroglios e furas

povertade, interessos, ingannias,

e puru maladia, disauras

chi penas alimentan, disanias.

Si non as paghe, s’aradu l’impitas?

E  chentza fantasia it’est ch’avitas ?

13 - Realtade

Deo non nego bruturas e gherras

ne tantu mancu furas o imbroglios,

ca cussas ingannias sun degoglios

de sos machines tuos in contierra.

Sa realtade ted’aer parte e perra,

ma cando iscudes sulu a sos iscoglios

pro bramas de sa tua fantasia,

si no avito, it'est gulpa mia?

14 - Fantasia

Si pesas cuss’otada in s’istadea

t’abizas chi sa tua est marrania,

a su machine as dadu sa cadrea

bramas a s’innotzente fantasia,

deo non ponzo frenos ne trobea

ma tratenzo sa tua padronia,

Non dias neghes a su tema meu

ca est nebidu e dulche che chereu.

15 - Realtade

Tratenes chena frenos padronias

ma negas fantasias esaltadas

e tue ch'as in manu cussas fadas

cale cadrea a setzer ti ponias?

Rejas de mele non sun fantasias

rejas de mele sun pro sas seadas

e si naras realtade ch'est marrana,

ite rispondo ch'est furesi o lana?

16 - Fantasia

Bido chi fantasia as in podere

si puru prontamente la revudas,

de issa t’uguro sias mere

si la perdes, abberu tind’impudas,

ca est cosa chi faghet piaghere

cand’in bene l’impitas e saludas.

E si tota l’atzetas sa proposta

tando cumprendes de it’est cumposta.

17 - Realtade

Ammito chi atzender una lughe

cando sa realtade suet iscuru,

ammoddigat cuss'ossu pius duru

pro gustare sa mendula e sa nughe.

Puru su ladru in sa segunda rughe

dae s'estru divinu leat ajudu,

ma su divinu pro si fagher frade

tessit e bestit custa realtade.

18 - Fantasia

Sa realtade, mira atentamente,

est fiza de sa mezus fantasia;

sa chi Deus teniat in sa mente

ch’esserat una bella poesia,

fat'at s’omine e cant’est esistente

cun totu s’universu in armonia.

E ca nde tenet manna facultade

cun fantasia at fatu realtade.

19 - Realtade

Si  semus parte de sa fantasia

non bendo custu tema a su destinu

pro cantu totu fizos de Cainu

bivo sa realtade ca est sa mia

ma si manu mi das in poesia

as un'Abele cun coro ladinu

e totu su sentidu fatu a prou

pro m'abbratzare cun su tema tou.

20 - Fantasia

Sa fantasia cun sa realtade

an cherfidu ch’esseran a cunfrontu,

e sola-sola arrivit veridade:

Ognuna at su sou torracontu,

sighin in vida ogni atividade

ma sun amigas e si tenen contu.

An ambas sa matessi degoria

sa realtade cun sa fantasia.