Bidas incarenadas (Altana)

 PRIMU PREMIU SEZ. 3.  CAT. 6.  (POESIA IN SARDU)

Iscanzende sas laras de sas nues, 
tebiu raju de sole in primas fozas 
neit: "Amore meu, si non fues, 
tintas e nuscos nd'an campos e lozas, 
e tue rundinedda non ti cues; 
impasta pro su nidu e ti b'apozas 
ca s'abe puru a prontu su melaghe 
prò dar'a fizos suos su tenaghe." 

S’istiu, ispiga groga e carasada 
mustrat pro lat'e panes beneitos; 
pumata, pumuderra e iscialada, 
e brinchitan anzones e crabitos. 
Cantat merula e chigula pasada 
e basan renas, mares biaitos. 
Tempos de brios e de galania 
chi cumbidat a coros s'armonia. 

Sa frina bantzighende lebias chimas 
ti porrit dulches frutos atunzinos 
pro pulentas e dulches pabassinos 
cun foghiladas de castanza e rimas; 
tochende dae cubas, primos binos, 
festana de incunzas graes istimas 
e olvidende penas e anneu, 
torran devotos sas grascias a Deu. 

Betzos cadruddos, fritos in s'afiu, 
isetan cancardos sos destinos. 
Eranu, ajò, ajua sos mischinos 
paris cun sos vigores de s'istiu, 
pro chi t’insinzen prima de s'adiu 
antigos passos pro noos caminos. 
Ammenta, chi si benes incarenas 
ti dat pro briu nou, ateras venas. 

Venas chi fintz'a morrer sempre dana 
pro acrescher de vida, intrea giostra, 
dae cand’a sutu sa prima colostra, 
a cand'ispuntat tremida matana. 
Siamus tando abbas de funtana 
e amparu a donzi vida nostra, 
ca sun panes prestados cun agonzu, 
prontos pro los torrar'a su bisonzu. 

Altana Antoni