Benennida Frantzisca (Giovanni Soggiu)

Iscena delicada e amorosa

chi onzi nonnu leat una fita

pro s'iscaldire sa carena frita

cun sa fiama pius geniosa. (altana)

 (Soggiu)

beni a m'abbratzare prenda cara

chi so 'e t'abbratzare disizosu,

custu tou surrisu generosu

chi regalas a nonnu, giaru nara.

Beni a nos abbratzare prenda mia

ca tropu tempus che vives lontana,

nois nessi e t'ider sempr'in gana

semus umpare cun nonna Maria.

Beni a nonnu candidu fiore,

beni a bratzos mios rie rie,

beni, cando in bratzos giuto a tie

mi pones in s'istante in bonumore,

Ajò, beni a passizu chi sa manu

ti dò pro chi sias pius segura,

chin tegus istimada criadura

oe mi palzo torrend'in beranu.

Frantzisca ses su bene pius mannu

ch'a sa etzesa nostra possedimus,

beni gia chi apenas resessimus

a t'abbratzare una olt'a s'annu.

Dogni feddu tou m'est apentu

d'ogni domanda tua m'est ispassu,

fintz'andende pianu a passu passu,

ido su tempus bolare che bentu.

Resto ammachiadu a t'iscultare

si osservende in caminu t'apuntas

e improvisas mi faghes preguntas

cun s'innotzente tou arrejonare.

S'iscurrizare tou a oju fissu

sigo continu cantos passos pones

e in sas infantiles assiones

t'est finas calch'imberriu permissu.

Ma apenas conclusas sas vacantzias,

solos che prima nos lassas inoghe

e s'in su filu intendimus sa oghe

nos ricumpensat sa tua mancantzia.

Apenas ch'a iscola pro dovere

deves andare, non timas fadigas,

dagh'imparas nos faghes duas rigas

e pro nois immensu piaghere.

Bramosos chi ses sana de ischire

e chi non b'at ostaculos in mesu,

pro chi vivende che sias atesu

nos torrat su eranu a fiorire.

T'auguro chi crescas virtudosa

e chin su bonu sensu pro guida

in domo, in iscola e in sa vida

vivas sana gentile e rispetosa.