Carrasciale mamujadinu (altana)

imbiada a su cuncursu de poesia de Mamujada

"Mi racumando, nod'e mucadores

chi sian bene istrintos suta ula

pro non pelder ispau, pedde e sula

e frusciare-nos mannos e minores.

In sos brincos ponide-bi vigores,

no che Totoi a brincos che mula,

ca de deghe marratzos ch'at in sedda

s'intendet solu calchi campanedda.

Contade passos, deo non chelzo neghes,

ca si faddides tres brincos apare,

mi falet raju, bos fato ufiare

e bos ispeddo che-i sas berveghes!

E tue Totoi, patronu tou preghes

chi non siat isse, su o'u a sulare,

ca s'idet cussos brincos chena marcu,

t'allughe isse che Giuanna D'arcu!

E bois issogadores, abberides

cussas orijas de picos de cava;

soga bene coglida, non che trava

chi bos trobojat pês e bi ruides.

Cussu de issogàre bene ischides,

ma si bi proat cando sind'iscrava'

dae tota sa massa ammuntonada,

si no, sa catza diventat catzada.

Bestes de turcos! Ischid'a primore,

ch'issogàdos sun fortzas de natura,

fecundidade, pioas e calura

e incunzas de robba e de laore.

Ponide in mente signora e signore

chena confunder sos nomes de ura.

Gratzia Porcu e tziu cozudu Becu

fecundidade, e Dominus tecu'.

Pro sa pioa Norina Cadinu

chin su maridu, Chicu rana Piu.

Poi, issogades tzia Pischedda Riu;

fatu, Sia Ruja, ura 'e sole ighinu.

Pro sas incunzas, poi dade s'avviu

a issogare a dotor Costantinu,

Mossiga Hunes e Toreddu Rassu,

ca si faddimus, est pro nois s'ammassu."

Altana