Sinnu 'e Paghe de Salvatore ladu

Bona sa poesia, ma pius bona

est cussa fide chi t'afortit coro

ch'idet su tou paris a s'insoro,

ghiadu dae manos de Gesusu

pro caminada tzerta a punt'in susu,

istrinende su briu ch'a tie isprona'. (Altana)

Su primu “Bona die” puzoneddos
Cantan su sole nou appena essidu
Che a issos pur’eo da su nidu
Falo cuidadosu, depo andare
Ojos a chelu, est s’ora ‘e mi sinnare
Cun su poddighe in cara, in sos cherveddos.

Semenende de Cristos s’onestade
Senza timer urruta e puntissusu
Cun sa prominta chi non pecco prusu
Ma lisco chi so debile che ou
Ruo e, mi peso dae bellu nou
Cunfidande in sa manu ‘e calchi frade.

Cand’isto male, un’ojada a su peus
Che cando Cristos in rughe ingravadu
Sas feridas apertas at mustradu
A sos frade chi l’an traittu e mortu
Ma pustis de tres dies est risortu
E regnada in su chelu accant’a Deus.

Tott’iscrittu a maduru in su Vanzelu
Chi coronadu d’ispinas in mente
Nò la perdet sa fide su credente
Pro la godire de Issu sa lughe
Lischit chi devet colare in sa rughe
Si los disizzat sos fruttos de chelu.

Simbulu ‘e paghe, sos brazzos apertos
De s’universu, amorosa funtana
Cal’ispera ‘e sole in sa ventana
Respiru chi abbrandat su dolore
Cuffortu ‘e su pentidu peccatore
Andala crara de coros inzertos.

Chie su crau l’at puntu sas manos
Chie sos pes l’at puntu ed est in pena
Chie los ada in totta sa carena
E los azzettat cun divinu amore
Sun tottus provas chi dat su Sennore
A nois debileddos Cristianos

Cando si pesan nues de tempesta
E sa lughe ‘e sa fide che perdimus
Sempere a cussu Sinnu li pedimus
Sazzudu suo pro vivere in festa.