Litera de Montanaru a Pedru Casu

Unu cumbidu de sa poesia,

dae sas costa de su gennargentu

chi falat e isparghet armonia

a cantos sardos mantenen s'ammentu.(altana)

I.

Chie cantat sas dulches cantilenas

chi m’han postu fiammas in su coro?

Da ue movene friscas custas venas

Risplendentes comente limpid’oro?

Ses tue, caru Pedru, ch’in Berchidda

limitante a Caddura e Logudoro

Has alluttu che ragiu una chintidda

chi subra sa larg’ala de su ’entu

s’est frimada de Desulu in sa idda

Posta sutta su mannu Ennargentu,

su monte sacru, s’altare mazzore

de ogni sardu ispiritu in turmentu.

Deo non pensaia a tant’onore

in su meu silenziu appartadu,

cando tue cun cantos de amore

E impetos de frade m’has chircadu.

No nde tenzo faeddos, Pedru caru,

pro narrer su cunfortu chi m’has dadu

Onorende s’amigu Montanaru

cun sas rimas sonantes e prufundas

chi cumponet su cantu tou giaru.

Deo cheria a dogni sardu saltu

cantare sa canzon’e primavera

cun sentimentu forte e bol’ispaltu.

Ma est trista sa razza gherriera

ch’in sos seculos mannos cumbattente

hat tentu semper alta sa bandera.

No nd’esistit, o Pedru, attera zente

chi tantu chei custa hapat suffertu

e camminadu contr’a sa currente

Cun su corpus de medas males fertu,

posta a ferru e a fogu de continu,

fattende de ogn’idda unu desertu.

Ma in tantu contrariu destinu

de sos Sardos s’ispiritu istad’este

sempere cuddu. Duru su camminu

Han cunsumidu isculzos, senza este,

mentras chi sa terra abbandonada

si est chei sa zente fatta areste.

Fidele sempre ma sempre dominada

che terra anzena piena ’e maramaglia,

che misera fizastra l’han trattada,

Mamma d’aera mala e de canaglia.

Ma issa subra de iras e offesas

ha mantentu sa sua forte iscaglia,

Sas suas naturales nobilesas,

s’ispiritu animosu de cumbattere

chi prima l’hana fatta in sas impresas

Chi non podet bantare nessun’attere.

In custos annos d’isettu penosu

mi s’est casi guastu su carattere

Pro tant’istadu nostru dolorosu.

II.

Ma tue naras, Pedru caru, est cambiada

sa sorte nostra in bene finalmente

e custa fiza non lezittimada

Han riconnottu intima parente

grazia a s’eroismu de sos fizos

non pro su cherrer bene ’e continente.

Sardigna mia, sos pesantes chizos

pesa e mira baddes e pianos

pro ch’allestru s’avveren sos disizos

E isperemus chi siet sa vigilia

de sa festa ispettada dae tantos

tempos antigos: siet sa familia

Sardignola cun mutos e cun cantos

allezzerida dae ogni pena

cun trivaglios nobiles e santos.

E deo ispetto sa festa serena,

annunziu de gloria segura

pro intonare s’alta cantilena

Ch’intendat Campidanu cun Caddura.

Riserva ai cuss’ora, caru frade,

cudda canzone tua pius pura

In paghe santa e vera libertade.