Bijones e Ischìdadas (Altana)

Muidas, sulos e tzocos in orija,

 frimman in cheas lutzigas pupias;

 in tziminea, fiammadas bias

 fin irrujende lichida cadrija.

Pro boghes miscias ch'ispinghian gianna

tra fruscios e tra muilos mi tremia,

tand'a coas de mamma m'astringhia

chilchend'ojada, s'isprammos m'ispanna’.

azulaiat un’umbra terrorosa

de una bete corruda mariposa

cun assustos continu minetende.

Poi cun ojos a s'aberi-tanca,

idei conca manna istultinada

e una forte manu annerviada,

ch'istratzaiat pilos cun sa franca.

Su gridu mi ch'esseit a tota uca

e oltulei mudantes dae sa canna.

Mamma pro mi coglire afanna-afanna,

mandeit in su brajeri fusu e ruca.

Tales assalcios, como sun diversos,

ma ancora iscodopan betzsas portas,

e sas antigas umbras, torra isortas

paren torrende cun bolos aversos.

Mostros chi an pro coro pedra dura

e francas pro sa uca sempre aberta,

istacan coa chei sa tiligherta

pro si sarvare pedde cun sa fura.

Cando las ispilimus sas arpias

o sardos de sas lichidas minetas?

 Cando las refudamus sas infetas

promissas de incunzas  premedias?

No nos fidemus de limb' 'e barones

ne de onores de su parlamentu.

Unimu fortzas ch'est veru cimentu

pro chi torren a pê sos fanfarrones.