sas bufonias de tiu Barore Tucone (Altana)

Abitende in su mantessi rione de Arai, cun tiu Barore Tucone, fit frecuente chi babbu si frimmaiat a arrejonare chin isse. Una die de sant’Andria, nachi fit fatende unu fritu de canes, cando babbu recuende chin ateros duos de su ighinu, l'imbichein essendende dae domo sua, a su cale ammentein chi fit s’ant’Andria; isse cumprendende subitu s’antifona, lis rispondeit in rima:

Emmo, est sant’Andria

E paret chi fiocat,

ma su inu lu tocat

su chi tzapat ebbia.

A cuss’intesa, totos trese sighein su caminu fatende cummentos pagu lizeros, cando intendein sa oghe de tiu barore chi los fit faeddende, chin unu fiascu  e una tatza in manos, poi agnangheit, sempre a malu grabbu: - mi, bufade a segundu su sidis!-    

xxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxx

una olta a unu poeta de giovana leva, chi li pedeit de poder suer  in cussa tita de sardu pellitzone, li rispondeit:

sa tita mia est sica che boltiju,

dare late non podet  a cust'ora;

tue ses seddalitu e non ses biju

ne a tempus de suer ses ancora,

pro aferrare su meu cabiju,

tocat prima sas dentes nd'oghes fora,

de duas una, o dentes destruer

o t'acunortas, bistas chena suer.

xxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxx

In unu tema cun Piras:

T'apo nadu a mi fagher unu noe

e m'as fat'unu chimbe ismutzurradu;

t'apo nad'a mi fagher un'aradu

e m'as fatu una conca de oe,

m'aias nadu chi l'as fatu oe,

invece est dae annu passadu,

t'apo nadu a mi fagher una craba

e mind'as fatu una conch'e raba.

e Piras li rispondeit:

Tutu custu, Tucone dees ischire,

sentza limba si podet faeddare,

cando ti fato goi est a partire,

cando ti fato goi est a frimmare,

cando ti fato goi est a pagare,

cando ti fato goi est a retzire,

cando ti fato goi est su saludu,

cando ti fato goi ses corrudu.

xxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxx

                                         Su numeru 7  cantadu dae tuconi non fateit ispantu meda ca enzeit cobeltu dae sa fama de su geniale numeru tres cantadu dae Piras, si puru non bincheit comente medas l’aian cherfidu, solu ca nomineit su numeru unu in tale otava. Ma si analizamus sa vera ottava de Tuconi, medas boltas mudada in sa trascritzione, est de leare in particulare atentzione pro su pesu iscientificu chi trasparet chin sa connoschentzia  de sos temas religiosos e de memoria chena umbra.

Innoghe apo trascritu sa vera otava chin sas ispiegasciones de sos riferimentos.

 

Sete sunu sos viscios capitales

supelvia-aggantzinadura-punna-imbidia-abbramidura-ira-mandronia.

 
sete sun sas sentetzias mazores, 

Passu de s’apocalisse. 1° cabadderi biancu-2° cab. Ruju-3° cab. Nieddu-4°cab. Ilde-5° animas  sacrificadas a causa de sa paraula de Deus, chi isetan vendita.-6° terremoto, sole nieddu, luna in sambene, isteddos subra sa terra.-

7° s’ultimu anghelu chi subra sa terra etat su fogu.

sete sun sos girones infernales,

1°) limbu- 2°)intrada infernale- 3°)abbramidos(bula)- 4°)ispeldisciadores e aggantzinados- 5°)airados e mandrones-6°)omitzidas sambenarios- 7°)omines bestiales.

(tzeltos trascrien (bolgias) ma sas bolgias sun deghe.)

 
s'arcubalenu at sete colores; 

ruju-giallu-ilde-prunetinu-biaitu-arantzinu-ìndigu

 
b’est bostianu ‘e sos sete pugnales, 

L’ana mortu chin sete pugnaladas.

Nostra Segnora 'e sos sete dolores. 

1)Profetzia de Simeone- 2)sa fuida in Egito- 3)sa perdida de Gesusu pitzinnu in su tempiu- 4)s’atopu chin su fizu in sa via crucis--5)Maria a pes de sa rughe- 6)Maria abbratzat Gesusu mortu--7)Maria idet interrende su fizu.

S’ispideru santu at sete ammentos

sabientzia-intelletu-cunsizu-fortesa-piedade-iscentzia-timore de Deus

e sete sos divinos sacramentos. 

batiju-eucaristia-penitentzia-untzione-crejuma-matrimoniu-ordine.