Gosos de Sant'Antoni de Lode’ (anonimu)

ca est torrande su beranu,

Antoni de Patuanu

preca pro su loteinu.

2.

Antoni chi sos cherveddos

ti lampana che arvata

preca pro sos moitteddos,

e pro sas capras anzatas,

e chi fattat bon’annata,

recottu e casu caprinu.

3.

Antoni de mal'ideas

chi m'andas a cana costa,

si sa terra ti s'intostat

it'est su pessu chi leas?

Dae perder sas tropeas

no ch'est fuitu s'ainu.

4.

Commo ch'has tastatu lande

non t'aggradat pius su mele.

Cudda notte punterande

che so ruttu in d'unu tele

e supritu est tiu Nichele

cun su 'oe purpurinu.

5.

Bessit tiu Biu-Bau

cun sas funes armicoddu;

sende chircande unu soddu

hat acattatu unu crau;

e nât Franziscu Imbarau:

Est atteru che sisinu!

6.

Antoni malu cottile

ch'andas a s'intan'intàna

a usu de crapa cana

chi non ghirat a cuile;

in su mese de aprile

no nos sicches su trainu.

7.

Antoni fortzas d'ostricu,

chin su nare che funtana,

preca chi achemas tricu

pro non morrer de sa gana;

e fache chi sas vacchianas

las curremas a caddinu.

8.

Antoni chi t'hana postu

in tupas de castannargios,

babbu tuo e babbu nostru

fin ghermanos primargios.

Sos ojos murinos vargios

ti lampan che gattulinu.

9.

Antoni si juches fronte

ti 'alanzas sa merenda,

ma precabilu a su Conte

chi nos lasset sa sienda,

chi non nocche bochet prenda

achende de aguzzinu.

10.

Antoni chi sa sientzia

la juches in su brenucu,

dae nos s'isperienzia

de 'occhire su preucu

pro ch'in sa mola 'e su trucu

nos est fatende caminu.

11.

Antoni petus de ferru

cantu bene ti merittas!

Libera nos dae s'inferru

e de tanazzas fuddittas:

fachelas chi sian frittas

pro cand'intrat su mischinu.

12.

Antoni cuccuri cottu

ch'andas semper pensativu,

ma senza b'haer motivu

istas achende abbolottu,

ispergiuru de unu bottu

non rispettas su 'ichinu.

13.

Antoni mura cherimus

e chi l'achemas a coffas,

e nois ti promittimus

de ti acher sas prantoffas:

ma si tue no ti moves

restas iscurtzu in caminu.

14.

Sant'Anna cuccuri pinta

sorre de Santu Matteu,

Santu Juanne cun Deu

istan jochende a ispintas ,

alligros comente pintas

in mesu a conzos de binu.

15.

Coladelu terra terra

non si che cogliet sa 'icu,

ca coment'est attrivitu

no nde lassat una perra;

semper est puntende gherra

che santu foras de tinu.