Pensabi tue Biddanò! (Altana)

Custa l'apo fata pro sa ricurrentzia de remundu piras e pro istuzigare sos istudiosos a promovere noas levas a s'arte de sa poesia improvisada.

Son gia trint'annos de rimas avaros,

cuddos montijos chi miran su Temo,

ma surzin versu e rima a noos laros

si de Re-mundu, sol'ammentu iscremo.

Tentu in adoru, che foza mi tremo,

s'in pensamentu torran temas caros,

chi fin venas de abba cristallina

e pro sa sarda limba, raighina.

Nuschende palcos che abe ola-ola

non l'aterrein frenos sotziales,

e cando clero e fasciu dein murrales,

tesseit su versu cun sa musarola.

De Roma e Grecia, s'ispada e s'istola

canteit in otadas magistrales,

e fide laica sua cun pro terrenu

at abbellidu fintzas creo anzenu.

Avvalora-lu custu, Biddanò!

pro chi venturu godat pinzos caros

e lode manna moat sos avaros

a dare a s'arte sarda giustu pro.

Torren sos emmos a mudare no

ch'etat in palcu dudas e imbaros,

ma brotet noa fruedda de s'isfida

chi est in s'estru sardu remonida.

Tue iscas sirigare sos talentos

de custos fizos nostros in apitu;

cola sos rios, iscutina entos,

chilira rena, pulga caldu e fritu

e faghe semenare sos ammentos

cun contos, cun cantadas, cun iscritu,

fatend'iscola a s'improvisadore

pro lu contivizare dae minore.

Mastra de mastros, mama maestosa,

Monteleone moe cun sa marina

e mustra a mundu mente medidosa

ca ses missa de musa marmurina;

mulghe cun mezoria meravizosa

mojos de mele moru pro mustrina

e mobilita milli muidos mannos

a modellos marcados dae minnannos.