Realtade e Fantasia

Primu Premiu Otavas Currende (Benetutti)

1 - Realtade (Nicolinu Pianu)
Duos temas de ponnere a cunfrontu
su tema menzus est toccadu a mie
ca bi fia pensende nott' e die
pro ti rispondere a termine prontu
pro valutare e pro fagher su contu 
chin cussu tema ch'es'toccadu a tie 
chi pagu alet pro s'umanidade
ca su chi contat est sa realtade.

 2 - Fantasia (Franzisca Flore)
Tottu ses nende tue a bottu tou 
senza essere sa gara cominzada 
e binchida ti l'asa immazzinada 
senza ponnere sos temas a su prou 
cando cantamus d'onzunu su sou 
tando cheret sa cosa valutada
si b'est sa realtade tua ebbia
su mundu es' tristu senza fantasia.

3 - Realtade
No es' tristu su mundu ne famidu 
inue bi so deo e contivizzo
sa fantasia pagu la disizzo
in sos impizzos no mi d'at achidu 
carchi orta in bisonzu mi so idu 
ma chi bi cherfat issa no mi abbizzo 
pensendebei ene a fundu a fundu 
pagu carculu tenet in su mundu.

4 - Fantasia
Tue mi cheres franghere a un'ala 
o mi cheres leare a pag'incuru 
ma in su mundu che so deo puru 
no ses tue chi jughes tottu a pala 
e senza bi esser deo ista seguru 
su mundu fit bistadu a chizza mala 
e no fit esistida sa pittura
ne operas de arte o iscultura.

5 - Realtade
Tue cheres intrare in cuntierra
senza leare in paghe s’argumentu
ma no imboles frases a su entu
o versos male fattos terra terra 
deo appo costruidu onzi apposentu 
e segadu appo roccas perra perra 
pro fagher domos a las dare a tie 
ue tenes amparu notte e die.

6 - Fantasia
Tue faghes barraccas e pinnettas
su tantu zustu 'e tenner un abitu
ma lea sas piramides d'Egittu
o a su Vaticanu ti adderettas
chin arcadas, colonnas e saettas
chi faghen incantare a primu acchittu 
de Santu Pedru sos frundagos suos 
sun pius bellos, menzus de sos tuos.

7 - Realtade
In sas operas mannas importantes
za b'est sa fantasia e sos artistas
e andan a las bider sos turistas
sos chi de cosas bellas sun amantes
ma cando istraccos abbassian sas cristas 
torran famidos a sos ristorantes
in cue torran a sa realtade
chirchende arrustu e binu 'e calidade.

8 - Fantasia
Mi pares lendedilu a sa lezzera 
ma no meritat gai s'argumentu
de imbolare versos a su entu 
cando no as de inchere sa manera 
deo isto in su tema e so cuntentu 
mi che parzo in sas nues in crociera 
sa fantasia mi che ponet susu
e de te tenzo puntos de piusu.

9 - Realtade
Ti sonnias fattende balentia
ma de abberu non de faghes una 
forsis no ti favorit sa fortuna
o mancas de corazzu e d'energia 
solu chin alas de sa fantasia
tue pigas e falas a sa luna
ma t'ido sempre arressu inue sese 
e deo inveze bi appo postu pese.

10 - Fantasia
Tue a sa luna che una saetta
ses pigadu e faladu in d'unu olu 
ma est b'intradu a mie s'oriolu 
a fagher cussa macchina perfetta 
a pigare a sa luna in sa navetta
tue b' as-postu sa crtena solu¬
tottu su restu appartenet a mie 
si cherzo deo che restas inie.

11 - Realtade
No ti cumbenit a perdere a mie 
tue a sa sola no podes istare
si no toccat a tie a bi pigare
ma cuss'impresa no narat a tie
ti sonnias sa luna e tue inie
ma no tenes corazzu a bi pigare 
cussas navettas tando an 'a servire 
pro puddas a criare e a crocchire.

12 - Fantasia
Lea su campu 'e sa telefonia 
cantos irventos sun bessende a fora 
e sa idea est de currere ancora 
fattu su tempus chin sa fantasia 
mancu majarzas fattende maia
isconzan su ch'inventan ora pr'ora 
e lu cherias tue in su cherveddu 
su chi b'est intro 'e su telefoneddu.

13 - Realtade
Corno su tempus lu tenes amigu 
e a su passu sou ses andende 
chin su telefoneddu ses joghende 
che battos chi si jogan in s'isprigu 
e su modernu chi ses impidende 
a inoghe a tres meses est antigu 
sempre isconzende mi pares a mie 
a notte su c'as tessidu a de die.

14 - Fantasia
Tue pares timende su progressu
e ses lende in su mundu pagu gustu 
a mie paret a su passu zustu
su tempus, cando mai si est arressu 
e si a tie no ti aggradat custu
lea su ch'est andende a su revessu 
gai che daes mala resessida
ca diventas antigu sende in vida.

15 - Realtade
Za ses joghende chin sa fantasia
e ses fattende macchinas perfettas 
ma joghende chin zertas macchinettas 
b'at zente arruinada in bidda mia
in chirca ‘e s'irricchire a una ia
sun a busaccas boidas derettas 
a s'irricchire no sun resessidos 
e s'an bendidu tottu e sun fallidos.

16 - Fantasia
Ma ite b'imrat chin sa fantasia
si b'at zente chi est debil'e carattere 
e proabei tue a bi cumbattere 
chin chie a de jogare sa mania
ca no sun zogos pro incher'ebbia 
si perden issos za s'irricchit attere 
pro no si arruinare carchi fessu 
tue cheres frimmare su progressu.

17 - Realtade
Deo no mi 'nde leo pensamentu 
m'agatto ene chin sa realtade
a triballare tenzo abilidade
chin ferramentas bonas so cuntentu 
ca devo attire a domo onzi alimentu 
e binu e frutta de onzi calidade
sa famillia est manna in domo mia 
mai ana manigadu fantasia.

18 - Fantasia
Ma no si campat de manigu ebbia 
no est solu su pane chi at sabore 
cando a muzzere tua as postu amore 
l'as afferrada a logu de orària
e l'asa leadu un aneddu 'e valore 
cale menzus motivu de allegria 
chin sa collana decchida e cuntenta 
atteru che buttega 'e ferramenta.

19 -Realtade
Sa politica puru est realtade
no isco si 'nde sese a connoschenzia 
e b'est sa crema 'e sa soziedade 
bene pagados pro sa cumpetenzia 
tra issos no bi'nd'at rivalidade
però b'at unu pagu 'e cuncurrenzia 
za bi'nd'at puru onestos in politica 
chi timen sa galera e i sa critica.

20 - Fantasia
Si la serramus goi sa partida
si podet narrer chin pagh' e amore 
ca niunu si 'nd'andat binchidore
e sa gara mi paret resessida
chin paragones mannos pro sa vida
e cunzettos de ordin'e rigore 
bonos pro parte tua e parte mia
in custa arresionada 'e poesia.