SA COMPUTERA (Altana)

Dae cand’apo custa computera

Pro ispelciare sitos

Sempre cun sos pes fritos,

perdende sonnu, atzolas e tramas.

Un’annu faghet apaghei bramas,

a grados altos nudrende s’ispera.

Totu mi naraian lealu, proa,

poddighes tinde linghes

e a mundu t’astringhes

che cando siat santa reparada,

ca donzi orta chi faghes intrada,

ides in betza festa, festa noa.

Millennoe cun sa Di-Esse-Elle

e maus pro istrina.

Postu l’at in coghina

e m’at totugantu ispiegadu:

“Custu cheret apenas abbarradu

e bides su nuraghe de loelle.

e cand’est internete cullegadu

abberis su chi cheres,

e teracos e meres,

ministros, presidentes, generales,

in arula ti enin che mannales”

e gai nende si mi nd’est andadu.

A bos contare su chi m’est sutzessu

mind’irgonzo che cane,

ca rosighende pane

promore chi endei totu s’imbarzu.

Colpu de tusciu mi deit s’iscarzu

chi respiru mi lasseit arressu.

Como non isco si fit pro s’ispesa

o si fit pro su tusciu,

ma so restadu musciu

pulende tastos a unu a unu

ca totugantos impiastrados sunu

cun sos colores de su panefresa.

bae in oramala, antzis… masca;

ite comintzu feu,

si durat cust’anneu,

totagantu su soddu tribuladu,

cun frutu ancora acorriadu,

ceunzat buca paris cun sa tasca.

Risorsas e pannellu de controllu,

poi de duas oras

mi essin che coloras;

abbarro e mi pedit de sistemas,

de iscanner, ischermos e problemas

chi nei - ..atzu, ritiradebollu!-

Isse mi neit: “gia ti lu retiro

ma a mesos inaris”

E tando fato paris,

mandende-che-lu a cudd’oru, lestru

e mi promito de bi ponner estru,

ca totugantos sos libros mi miro.

A fortza de bufadas e de ustos

ca m’ajuan in domo;

abberu poto como

iscrier su chi como bos legides,

puru si su suore no idides,

ca onzi nota inglesa, sono assustos.

E bido load, chat e leyotu

cun server e beckapa,

zum, blog, fail, setapa,

chi massidda a trofigos traucat,

tantu chi sola sa limba si tucat.

Bighinos, chi s’arte an riconnotu,

nende –(remov de rope)- mi saludan

e macacu, calcune,

narat: - ogali  fune! -

A balla,cantu s’estru miminizan

cando cun sos machines ispassizan!

Benomale son pagos e s’impudan.