SOS DANTES SARDOS (Altana)

Sos linbistas? Califfos de s’Arabia.

Sas limba Sarda? Un’arrabbiada,

chi prima, nachi fit ingabbiada

cun cadenitas de sos dantes sardos

e como issos chena riguardos

l’innudan e la torran a sa gabbia.

Li dan su olu a s’interinada,

nendeli, mudandas de si ogare,

gai chi cand’istraca de olare

drommat nuda a longu manzanile,

mantenzende abeltu su giannile

ue non cheren siat istrobbada.

Non bastat nuoresu, logudoro,

campidanu,tatari e caddura,

alghero e tabarchina cultura

a custa sarda isula tirrena,

ma pius manna cheren sa cadena

de sa noa penosa limb’insoro.

Naro – ma prite non nd’isposan una

de cussas chi cust’isula bos passa’?

Ite mai bos dat cussa bagassa

fata dae sete babbos pro chi sardos?-

Un’asilada de libros bastardos

pro alludare istorica fortuna?

Puru piemontesu, menzus petzas

Mannu cunfirmat chi nos an furadu

e como, torra a culu paradu

pro leare soddu europeu,

chin biculos de limba in ozuseu,

torrad’a noa subra peddes betzas.

Gai restamus che sardas forestas

cando passein sa serra toscana

o cando cun su regnu tancad’ana

cumonales, pro rier sos barones.

Sas limbas sardas pro sos foghilones,

e s’esperantu sardu pro sa festas!

(Su fasciu mi cueit in buja chiza

e como cheren de torare istria.

Ma nademi cal’est sa sorte mia;

ender overas pro anzena fiza?)