Iscratzos

Custa l'aia fata tempu faghet pro sa proposta 
de faghere una limba sarda unificada. Oje su parrer meu 
est mudadu unu pagu 

Iscratzende apo intesu calchi trae;

forsis bi semus, forsis custa est s’ora

de los truvare nende: “bae- bae”.

Cantos suspiros, pro sulciare cora

e aer che Roma, lacanas signadas,

nende a su frade - bessimiche fora.

Mai creia, grefa addutorada,

a pistoncos, sas nastulas tzoccare

pro impressire naschida istrumada.

Dante in Ravenna s’intennet gridare

intro sa tumba: “ Si no si nde falan:

afungade s’iscafu in mesu mare”.

Custos decanos chi pro sardu iscialan

noos golpetes, ragas e berritas

unificadas, dechìdos, regalan;

e cheren ponner torra sas bullitas,

in iscalpas a tzocu unificadu,

a istenterios s'amus imbisitas.

A su ( i-i ), chi caddu ad sempre nadu,

mudan segunda ( i ) in una ( o ),

d’aininu limbazu esperantadu.

Bae e chilca, chi ricu de Uddusò

pro pedire ritaldos de s’afitu,

invece ‘e dami, como no niat – do -.

Bida sa capa ch’est male sestada,

iscriide sa limba ‘e su cumone,

prima chi boes bi passen s’arvada

o chi s’antigu ( feu ) si si cumpone’

chin casteddaju ( leggiu ) in nou brotu,

nomen ( feleggiu ), chie no est Adone.

Ma nois sighimu a narrer bucalotu,

prima chi s’ogiemme ‘e su limbazu

innestet sos machines a fiotu.