Su sapadu de sa idda

Sa giovanedda, a s'imbelta ‘e sole,

lassat falche in alzolas,

arriende-si s’erva ; e in sa manu

unu matule ‘e rosas e violas,

(chin cales ti consolas)

approntare ornamentu

s’incras, ch’es die de festa, tritza e sinu.

Setzit chin su ighinu

in s’iscala a filare, sa etzedda

a ojos ue interinat

die;

e ammentende enit de sos tempos,

cando in die de festa s’abbelliat,

e ancora pisedda

soliat ballare sa sera chin cuddos

cumpanzos suos d’edade noedda.

Gia murinende aeras,

s’imbiaitat serenu, e torran umbras

dae sedda a cobelturas,

in lunares imbios de lumeras.

Como, tocos dan signu

de sa festa chi enit;

e pro sonos dia narrer

chi coros ricunfortat.

Sos piseddos gridende

in sa carrera a frotas,

istan totue brinchende

chin allegru bacanu ;

e intantu torrat a bramada chena,

frusciende su massaju,

e tra se pessat a sa die ‘e riposu.

Poi, cando in giru es morta onzi lumedda

e sa calma s’insedda’;

su malteddu s’intendet chin sa serra

de mastru ascia, izende

in sa butega a lughe ‘e candela,

e lestru, faghet mediu

dare cunsigna prima ‘e s’avreschida.

Custa, de sete es gradessida die

de ispera e apentu:

crasa tristesa e istentu

ti atin oras, e tribulu usadu,

a donz’unu in sa mente faghet torru.

Piseddu ispensieradu,

custa edade fiorida

es chei sa die d’allegria piena;

die jara e serena

chi ti suprit a festas de sa vida.

Godi piseddu meu, s’ora suave,

dulche istajone es custa.

De pius no chelzo narrer, ma sa festa

pro chi taldu t’enzerat, no siat grave.