PARADISU XXXIII

Custu est s'ultimu cantu de su paradisu ue descriet s'invocascione e su antu de Santu Bennardu a Maria, preghendela pro chi Dante potat cuntemplare s'Essentzia Divina.

1) “ Virzine mama, fiza ‘e su tou fizu, 2) umile e alta pius che criadura, 3) dissignu fissu d’eternu cussizu, 4) tue ses chie, s’umana natura 5) nobiliteis, si chi su fatore 6) no disdigneit d’esser sua fatura. 7) In bentre tua riatzendeis s’amore, 8) pro cale caldu de s’eterna paghe 9) sirigheis asie custu fiore. 10) Pro nois, alta lughe e piu tenaghe 11) de caridade, e suta tra mortales, 12) de onzi ispera ses surzida ambaghe. 13) Femina grande ses e tantu ales, 14) chi si pro grascia a tie no benini, 15) olos chen’alas, restan bramas tales. 16) De ajudu tou benignu nde cumbenini 17) chie los domandat, ma in cantidade 18) has dadu ispissu, prima chi lu pedini. 19) In te miserigoldia, in te piedade, 20) in te magnificentzia, in te costrutu 21) cantu nd’hat criadura in bonidade. 22) Custe, chi dae su pius basciu putu 23) de s’universu, fena ainnoghe hat bidu 24) su viver de onzi ispiritu, ue es jutu, 25) suplicat tue, pro grascia favoridu, 26) tantu chi potat sos ojos alciare 27) pius in altu, pro s’ultimu afidu. 28) E deo chi mai pro me chelfei mirare 29) pius chi no pro isse, sa pregunta 30) ti porro e prego, iscassa, de no dare, 31) e pro chi neula li enzat iljunta 32) dae neu mortale, chin sos pregos tuos, 33) a bramas suas, cuntzedat, summa punta. 34) E ti prego, reina, a sos conclus, 35) chelfas chi custe nde remonzat sanos, 36) apoi chi mirat, sentimentos suos. 37) Frenali tue istintos umanos: 38) bide Beatrice chin cantos biados, 39) a su chi pedo, giuntu ana sas manos. 40) Sos ojos dae Deu venerados, 41) fissos a su pregante, dimustrein, 42) cantu devotos pregos sian prejados;

43) gai a s’eternu lume s’addritein, 44) su cale no si cretat, sian manizos 45) chi asi jaros, ateros idein. 46) E deo a s’acabbu ‘e sos disizos, 47) cabulei, e comente si deviat 48) finein in me totu sos prammizos. 49) Bennardu a surrisos m’induiat 50) chi are alciadu s’oju, ma gia fia 51) dae me mantessi a su chi cheriat; 52) e sa vista, enzendemi pius bia, 53) manu manu intraiat in su rujore 54) de sa profunda lughe bera e pia. 55) Dae cue in poi, fit bider mazore, 56) chi limba nostra a esplicare tzedit, 57) e tzedit sa memoria a tale ardore. 58) Cale a cusse chi sonnu li cuntzedit, 59) ma a s’isciarida, solu sensu impressu 60) restat, ca s’ammentu bi l’impedit, 61) tale a mie, guasi totu arressu 62) su ch’idei, chi ancora mi distilla' 63) dulchesa in coro, de su ch’est sutzessu. 64) Asie su nie a sole dissizilla'; 65) asie tra bentu in sas lebias fozas 66) si cunfunden rispostas de Sibilla. 67) O summa lughe ch’in altu t’ispozas 68) de cuntzetos mortales, dami mente 69) in su chi m’apalfeit paghende ozas, 70) e faghe limba mia tantu potente, 71) chi un’ischintidda de sa tua gloria, 72) pota lassare a benidora zente; 73) ca si torreret, pagu a sa memoria, 74) e intonare custos versos dia, 75) pius s’hada a cuntzeper tua itoria. 76) E creo, cando punta ajulaia 77) de iu raju, chi ja fia perdidu, 78) si ojos mios, da isse istrejaia; 79) e m’ammentat chi fia asi imbozidu, 80) de agguantare tantu de che jungher 81) su ider meu in valore infinidu. 82) Sa manna grascia, ue pretenzei pungher 83) Sos chizos mios intro lughe eterna, 84) tantu chi tota vista tocheit mungher!

85) In fongulesa sua la ido interna, 86) dae amore ligada in una umpare, 87) cun s’universu e su chi lu guverna: 88) sustantzia, calidade ei su mudare, 89) cumpenetradu a nodu luminosu, 90) chi dare contos est che lampizare. 91) Sa fromma ‘e s’universu maestosu, 92) es beru, idei, prite pius allargu, 93) pro lu nomare ancora, ispalgo gosu. 94) Solu un’azigu m’es dromminzu amargu, 95) che vintichimbe seculos s’impresa 96) ch’ispanteit Netunu, a s’umbra d’argu. 97) Asi sa mente mia, tota suspesa, 98) fissa e frimma miraiat atenta, 99) chi a l’iscrutare, imbozat pius tratesa. 100) Dae cussa lughe, asi si diventa, 101) chi oltaresi da issa a nou suggetu, 102) no es possibile mai chi lu cunsenta; 103) prite su bene , ue punnat isettu, 104) totu recuit, e su ‘e fora inghiju, 105) es diffetivu cantu cue perfetu. 106) Oramai, fagher contos benid liju, 107) ca pro cantu m’ammento es che criadura 108) chi ancora infundat sa limba in cabiju. 109) No fit ch’idei pius d’una fregura, 110) cand’hapo in biu lume abbaidadu, 111) ca tale es sempre dae comintzadura; 112) ma pro sa vista chi m’hada alanzadu 113) mirende fissu, sa sola palfentzia 114) mudende idia, ma fia deo mudadu. 115) In s’irrajada e fongula essentzia 116) de s’altu lume, m’apalfein tres giros 117) e tres colores pro circunferentzia

118) che duos arcos de chelu a ispiros 119) rifflessos, e i su tertzu pariad fogu 120) allughende trapare sos respiros. 121) Cantu de cultzu narrer nd’at insogu, 122) cuntzetu meu, ca tra custu e bidu, 123) es pagu si, chi a narrer pagu, es jogu. 124) O lume eternu, solu in te innidu, 125) in te cumpresu e dae te intelletu, 126) e in su cumprender, d’amore gioidu! 127) S’arrodiare asi precuntzetu, 128) palfende in te, che lume rifflessu, 129) mi poniat su ider pius netu 130) intro de se, e in colore impressu, 131) pariat pintu s’umanu fatinzu, 132) pro cantu bisu aia in isse arressu. 133) Cale su geometricu pispinzu 134) pro misurare chilciu e no nde ogat 135) atzola, de printzipios pro insinzu, 136) tale deo a su nou, chi oju allogat, 137) bider cheria ene e cumproare 138) coment’intro s’immagine b’aciobat, 139) ma no fidi pro me, alas pesare, 140) si no cando sa mente isteit mazada 141) da unu lampu chi m’hat tentu a pare. 142) A s’alta fantasia, forza es mancada; 143) ma mover faghet disizu e melmeddu 144) comente e roda chi li diat girada, 145) s’amore movet sole e d’onzi isteddu!.